«Առավոտ». Ի՞նչ կանի ԲՀԿ–ն. քննարկվում է երեք տարբերակ

«Հայ ազգային կոնգրեսը հանրահավաք չի անի այնքան ժամանակ, մինչև նրա առաջնորդ Լևոն Տեր-Պետրոսյանը չորոշի` առաջադրվում է, թե ոչ: Իսկ առաջին նախագահը դա չի ասի այնքան ժաճանակ, մինչև Գագիկ Ծառուկյանը չասի` նա ինքնուրո՞ւյն է առաջադրվում, թե՞ պաշտպանում է որևէ այլ թեկնածուի: Ինքնին այն փաստը, որ ՀԱԿ-ի գործողություններն ամբողջությամբ պայմանավորված են ԲՀԿ-ի գործողություններով, իսկ առաջին նախագահի հետագա քայլերը կախված են ԲՀԿ-ի առաջնորդի քայլերից, մեղմ ասած` օգուտ չի բերում ոչ Կոնգրեսին, ոչ էլ նրա ղեկավարին: Եթե դու ինքնուրույն քաղաքական ուժ ես և ունես քո հստակ նպատակները (պայմանականորեն այդպես անվանենք «օր առաջ այս ռեժիմից ազատվել»-ը` չնայած այստեղ էլ որոշակի խնդիր կա), ապա դու պետք է առաջարկես մյուսներին միանալ քեզ, ոչ թե քո ծառայություններն առաջարկես ուրիշներին` հարմարվելով նրանց օրակարգին, որը հստակ չէ, բայց ակնհայտորեն «ռեժիմից ազատվելը» չէ: Ըստ երևույթին, Լևոն Տեր-Պետրոսյանի համար ավելի ձեռնտու է կողմնորոշվել ավելի շուտ, քան դա Ծառուկյանը կանի' հակառակ դեպքում ձգձգման ամեն մի օր հաստատում է Կոնգրեսի երկրորդական, օժանդակ, «կցորդային» դերը: Եթե, այնուամենայնիվ, այդպիսի երկարատև «պաուզայից» հետո Տեր-Պետրոսյանը որոշի չառաջադրվել և պաշտպանել որևէ այլ թեկնածուի, դա լուրջ տեղաշարժեր կառաջացնի Կոնգրեսում, և այդ քայլը կողջունեն միայն նրանք, ովքեր վստահ են, որ առաջին նախագահի բոլոր մտքերն ու քայլերը հանճարեղ են:

Ինչ մնում է ԲՀԿ-ին, ապա այնտեղ, որքան հասկանում եմ, քննարկվում է երեք տաբերակ.

1. առաջադրվում է Ծառուկյանը (դա, իմ կարծիքով, կուսակցության համար լավագույն տարբերակն է),

2. կուսակցությունը պաշտպանում է Սերժ Սարգսյանի թեկնածությունը (պակաս գերադասելի է, որովհետև այդ դեպքում ԲՀԿ-ն ստիպված կլինի հրաժարվել թե Օսկանյանից և թե բազմաթիվ ընդդիմադիր ձևակերպումներից),

3. չառաջադրվել և ոչ մեկին չպաշտպանել (ինձ թվում է` ամենավատ տարբերակն է, որովհետև կասկածի տակ կդնի կուսակցության կենսունակությունը):

Դժվար է, իհարկե, կանխատեսել, թե ինչպես է հանգուցալուծվելու այս ինտրիգը, բայց ամենահավանական և ամենաբանական տարբերակը հետևյալն է` առաջադրվում են թե՛ Տեր-Պետրոսյանը, թե՛ Ծառուկյանը, բայց հայտարարում են, որ միասնական գործողություններ են իրականացնելու՝ ընտրությունների արդարությունն ապահովելու ուղղությամբ, և այդ համագործակցությունը պետք է լինի ավելի խորը և բազմակողմանի, քան Հմայակ Հովհաննիսյանի համակարգած «միասնական շտաբը»:

Մի բան կարող եմ կանխատեսել 100 տոկոսով՝ անկախ նրանից, թե ինչպես կընթանան ընտրությունները և ով կհաղթի դրանցում, ավազակապետությունը չի կազմաքանդվի և ռեժիմը չի փոխվի: Բայց դա այլ թեմա է»,– «Առավոտ»–ի այսօրվա խմբագրականում գրում է Արամ Աբրահամյանը: