«Հրապարակ». ՀՅԴ-ն, հնարավոր է, բոյկոտի ընտրությունները

Բավականին հետաքրքիր իրադրություն է առաջացել ԲՀԿ նախաձեռնած կոնսուլտացիաների շուրջ. բանն այն է, որ ԲՀԿ-ի հետ առաջինը կոնսուլտացիայի նստած ՀՅԴ-ն ևս կոնսուլտացիաների շարք է սկսել: Այսօր ՀՅԴ-ն հանդիպելու է ՕԵԿ-ի, իսկ երկուշաբթի` ՀԱԿ-ի հետ: «Հրապարակ»-ը գրում է, որ բիզնեսը քաղաքականությունից տարանջատելու պլատֆորմով հանդես եկող ՀՅԴ-ն դեմ է Ծառուկյանի թեկնածությունը պաշտպանելուն: ՀՅԴ շարքերում, ինչպես ՀԱԿ և ՀՀՇ շարքերում, այդ առնչությամբ լուրջ դժգոհություն կա` մի տարբերությամբ, որ ՀՅԴ շարքերում չեն ցանկանում որևէ այլ թեկնածուի, նույնիսկ Վարդան Օսկանյանին պաշտպանել:

«Հրապարակ»-ի դաշնակցական աղբյուրները չեն բացառում, որ դեկտեմբերին կայանալիք ՀՅԴ արտահերթ Գերագույն ժողովի ժամանակ տեղերից ընտրված պատվիրակները հարց բարձրացնեն սեփական թեկնածուով մասնակցելու մասին, և քանի որ ՀՅԴ-ում իսկապես որոշումների կայացման դեմոկրատիկ սիստեմ է գործում, նաև հաղթեն:

Հիշեցնենք, որ թե Հրանտ Մարգարյանը, թե Վահան Հովհաննիսյանը հրաժարվել են թեկնածու առաջադրվել, որովհետև հասկանում են, որ ՀՅԴ-ն այս ընտրություններում շատ քիչ ձայն կհավաքի, ինչն էլ կուսակցությանն ընդհանրապես լուսանցք կմղի: Էլ ավելի անմխիթար կլինի վիճակը, եթե ՀՅԴ երկրորդ էշելոնից թեկնածու առաջադրվի` Արծվիկ Մինասյանի կամ մեկ այլ դեմքով: Ինչպես տեղեկացնում է թերթի աղբյուրը, դա է պատճառը, որ ՀՅԴ-ն սկսել է զուգահեռ կոնսուլտացիաներ անցկացնել, որպեսզի հարկավոր պահին կարողանա ընտրությունները բոյկոտելու, իսկ որ առավել հավանական է` չմասնակցելու պատճառաբանություն ունենալ: