Օբաման Նեթանյահուի և Մուրսիի հետ քննարկել է իրավիճակը Գազայում

ԱՄՆ-ի նախագահ Բարաք Օբաման վերջին մի քանի օրվա ընթացքում արդեն երկրորդ անգամ հեռախոսազրույց է ունեցել Իսրայելի վարչապետ Բինիամին Նեթանյահուի և Եգիպտոսի նախագահ Մուհամմեդ Մուրսիի հետ՝ քննարկելով իսրայելա-պաղեստինյան հակամարտության կարգավորման հնարավոր ուղիները։ Այս մասին հաղորդում է Вести.ru-ն՝ հղում կատարելով Սպիտակ տան մամուլի ծառայությանը։

Ըստ հաղորդագրության՝ Նեթանյահուն զանգահարել է Օբամային, որպեսզի տեղյակ պահի նրան Գազայի հատվածում և Իսրայելում տիրող իրավիճակին։ Առաջնորդները քննարկել են գործողությունների տարբերակները՝ իրավիճակի լարվածությունը թուլացնելու համար։ Նեթանյահուն իր խորին երախտագիտությունն է հայտնել ԱՄՆ-ին, այդ թվում՝ նաև հակահրթիռային պաշտպանության համակարգի մշակման համար, որը նախատեսված է մարտավարական հրթիռների և ականանետների ոչնչացման համար։

Օբաման կրկին վերահաստատել է ԱՄՆ-ի աջակցությունը Իսրայելի ինքնապաշտապնության իրավունքին՝ խորին ափսոսանք հայտնելով խաղաղ իսրայելցիների և պաղեստինցիների մահվան կապակցությամբ։

Օբամայի և Մուրսիի հեռախոսազրույցը Եգիպտոսի նախագահ Մուհամմեդ Մուրսիի հետ կայացավ ամերիկյան կողմի նախաձեռնությամբ։ ԱՄՆ-ի նախագահը բարձր է գնահատել Եգիպտոսի ջանքերը, որոնք ուղղված են ճգնաժամի թուլացմանը, և հույս հայտնել, որ Եգիպտոսի փորձերը հաջողությամբ կպսակվեն։

Այս կապակցությամբ Օբաման ընդգծել է իրավիճակի շուտափույթ կարգավորման անհրաժեշտությունը՝ կայունության վերականգնման և հետագա զոհերից խուսափելու համար։ Օբաման և Մուրսին պայմանավորվել են մոտակա օրերի ընթացքում սերտ կապի մեջ լինել. հաղորդում է ИТАР-ТАСС-ը։