Մոտ 50 երեխայի կյանք խլած պատահարից հետո Եգիպտոսի տրանսպորտի նախարարը հրաժարական է տվել

Եգիպտոսի տրանսպորտի նախարար Մուհամմեդ Ռիշադ ալ Մաթինին հրաժարական է տվել Ասյուտ գավառում ողբերգական վթարի պատճառով, որտեղ գնացքի և դպրոցական ավտոբուսի բախման հետևանքով, ըստ վերջին տվյալների, զոհվել է մոտ 50 երեխա. այս մասին հաղորդում է An Nil հեռուստաալիքը։

Շաբաթ օրը առավոտյան գնացքը, որն ուղևորվում էր Կահիրեից դեպի Ասուան, բախվել է ավտոբուսին երկաթուղային անցումներից մեկի վրա Ասյուտ գավառի Մանֆալուտ բնակավայրի մոտակայքում։ Ավտոբուսում մոտ 60 երեխա կար։ Ըստ վերջին տվյալների՝ ողբերգության արդյունքում զոհվածների թիվը հասնում է 50-ի։

Նախարարն իր վրա է վերցրել պատասխանատվությունը շաբաթ օրը տեղի ունեցած վթարի համար։ Հրաժարականի մասին դիմումն ուղղված է Եգիպտոսի նախագահ Մուհամմեդ Մուրսիին։ Հրաժարական է տվել նաև Եգիպտոսի Երկաթուղային կազմակերպության ղեկավարը։