Զարուհի Փոստանջյանի հավանական նոր պաշտոնը

Երեկ մամուլում լուրեր հրապարակվեցին, որ «Ժառանգություն» խմբակցության ղեկավար Ռուբեն Հակոբյանն արդեն Աժ նախագահ Հովիկ Աբրահամյանին գրություն է ուղարկել խմբակցության անդամ, «Ազատ դեմոկրատներ» կուսակցության ներկայացուցիչ Ալեքսանդր Արզումանյանին ԱԺ Արտաքին հարաբերությունների մշտական հանձնաժողովի փոխնախագահի պաշտոնից հետ կանչելու մասին:

Լուրեր.com-ը զրուցել է ԱԺ «Ժառանգություն» խմբակցության ղեկավար Ռուբեն Հակոբյանի հետ, ով նշեց, որ հարցը սխալ է ձևակերպված։

«ԱԺ կանոնակարգ օրենքի համաձայն՝ հանձնաժողովի անդամները, պատվիրակությունների կազմի ներկայացուցիչները ներկայացնում են խմբակցությունը։ «Ազատ Դեմոկրատներ» կուսակցությունը հայտարարել է, որ Ալեքսանդր Արզումանյանն այլևս չի ներկայացնում «Ժառանգություն» խմբակցությունը, պատասխանատվություն չի կրում «Ժառանգություն» կուսակցության գործունեության համար և ներկայացնում է «Ազատ Դեմոկրատներ» կուսակցությունը՝ ֆորմալ, ձևական առումով մնալով «Ժառանգություն» խմբակցության մեջ»,- ասաց Հակոբյանը։

Նրա խոսքերով՝ բնական է, որ եթե Արզումանյանը չի ներկայացնում «Ժառանգություն» խմբակցությունը, խմբակցությունը պետք է ունենա իր ներկայացուցիչը։

«ԱԺ կանոնակարգ օրենքով խմբակցության ղեկավարը ներկայացնում է իր թեկնածուներին։ Այս առումով ես գրություն եմ ուղարկել ԱԺ նախագահին, թե ովքեր են ներկայացնելու «Ժաառանգություն» խմբակցությունը հանձնաժողովներում, պատվիրակությունների կազմում և բարեկամական խմբերում»,-ասաց Հակոբյանը։

Հարցին, թե Աժ Արտաքին հարաբերությունների մշտական հանձնաժողովի փոխնախագահի պաշտոնում ում թեկնածությունն է առաջարկվել, Հակոբյանն ասաց.

«Դոնթի բանաձևով՝ խմբակցությունն իրավունք ունի ունենալ ԱԺ մշտական հանձնաժողովների մեկ տեղակալ, և քանի որ Զարուհի Փոստանջյանը Գյուղատնտեսական և բնապահպանական հարցերի մշտական հանձնաժողովի անդամ է, «Ժառանգություն» կուսակցությունն առաջարկել է այդ հանձնաժողովի պաշտոնում առաջարկել Զարուհի Փոստանջյանի թեկնածությունը»։