Թուրքիան մտադիր չէ բանակցել Իսրայելի հետ. Էրդողան

Թուրքիան մտադիր չէ բանակցությունների մեջ մտնել Իսրայելի իշխանությունների հետ՝ Գազայի հատվածում իրավիճակը կարգավորելու համար. այս մասին հայտարարել է Թուրքիայի վարչապետ Ռեջեփ Թայիփ Էրդողանը. տեղեկացնում է TRT Haber-ը:

«Թուրք-իսրայելական հարաբերություններն այս պահին զրոյական են, ուստի խոսել Գազայի ուղղությամբ Իսրայելի հարձակումները դադարեցնելու հարցի շուրջ Անկարայի և Թել Ավիվի միջև բանակցությունների մասին, անիմաստ է»,-ասել է Էրդողանը և հավելել, որ Իսրայելի հետ պետք է բանակցեն այն երկրները, որոնք սերտ կապերի մեջ են վերջինիս հետ:

Նա նշել է նաև, որ այս գիշեր պատրաստվում է հեռախոսային խոսակցություն ունենալ ԱՄՆ-ի նախագահ Օբամայի հետ, ինչպես նաև ցանկանում է բանակցել Ռուսաստանի նախագահ Վլադիմիր Պուտինի և ՄԱԿ-ի գլխավոր քարտուղար Բան Կի Մունի հետ:

Հիշեցնենք, որ ավելի վաղ, չնայած «Մավի Մարմարա» թուրքական նավի վրա իսրայելական հարձակման պատճառով թուրք-իսրայեական հարաբերությունների սառեցմանը, Թուրքիայի փոխվարչապետ Բյուլենթ Առընչը Իսրայելին կոչ է անում քննարկել Գազայի հատվածի վրա հարձակումների դադարեցման հարցը:

«Անհրաժեշտ է բանակցություններ վարել հարձակումների դադարեցման հարցի շուրջ: Հարձակումները քննադատվել են, և Իսրայելին պահանջ է ներկայացվել, որ դրանք այլևս չկրկնվեն»,-ասել է Առընչը: Նա հավելել է նաև, որ Իսրայելը չունի ոչ մի բարոյական և իրավական հիմք այդ հարձակումների համար: