Ցավակցական հեռագիր Արցախյան շարժման վետերան Վիգեն Հայրապետյանի ընտանիքին

Արցախյան շարժման վետերան,
Ստեփանակերտի պատվավոր քաղաքացի
Վ.Ս. Հայրապետյանի ընտանիքին

Խոր վշտով ու կսկիծով տեղեկացանք մեր ժողովրդի արժանավոր զավակ Վիգեն Սուրենի Հայրապետյանի մահվան մասին:

Վիգեն Հայրապետյանը մեծ հարգանք էր վայելում ինչպես Արցախում, այնպես էլ Հայաստանում ու Սփյուռքում: Նա մեծ ներդրում ուներ Արցախի Հանրապետության կայացման գործում, եղել է ղարաբաղյան ազատագրական շարժման առաջամարտիկներից, ում ղեկավարությամբ տեղի է ունեցել Լեռնային Ղարաբաղի ժողովրդական պատգամավորների մարզխորհրդի 1988թ. փետրվարի 20-ի պատմական նստաշրջանը, եւ հենց նա է 1991 թվականի սեպտեմբերի 2-ին հրապարակել ԼՂՀ հռչակման մասին հռչակագիրը:

Անգնահատելի է Վ.Ս.Հայրապետյանի ներդրումը նաեւ կրթության զարգացման գործում: Նա կրթել եւ դաստիարակել է բազմաթիվ սերունդների' սերմանելով սերը գիտելիքի եւ հայրենիքի հանդեպ:

Պետությունն արժանվույնս է գնահատել Վիգեն Հայրապետյանի վաստակը՝ պարգեւատրելով նրան «Գրիգոր Լուսավորիչ» շքանշանով եւ պետական այլ պարգեւներով, շնորհելով ԼՂՀ վաստակավոր մանկավարժի պատվավոր կոչում:

Լեռնային Ղարաբաղի Հանրապետության ողջ ժողովրդի, իշխանությունների եւ անձամբ իմ անունից խորին վշտակցություն ու զորակցություն եմ հայտնում հանգուցյալի բոլոր հարազատներին ու մերձավորներին: Այս ծանր պահին մենք ձեր կողքին ենք եւ ձեզ հետ միասին կիսում ենք անդառնալի կորստի ցավը:

Վիգեն Հայրապետյանի պայծառ հիշատակը միշտ վառ կմնա բոլորիս սրտերում:

Բակո Սահակյան