Հայ իրավաբանների միության նախագահը «նեղն է գցել» Ադրբեջանի գլխավոր հյուպատոսին. Asbarez

Հայ իրավաբանների միության նախագահ Կարո Ղազարյանը բացահայտել է Լոս Անջելեսում Ադրբեջանի հյուպատոս Նասիմի Աղաևայի սուտը: Ղազարյանն իր անհամաձայնությունն է հայտնել Ադրբեջանի կողմից հնչող իրականությունն աղավաղող հայտարարությունների նկատմամբ՝ անդրադառնալով Ադրբեջանի, այսպես կոչված, «փոքրամասնությունների, այդ թվում` հայերի նկատմամբ վարած հանդուրժողականության քաղաքականությանը», որի մասին Լոս Անջելեսում համաշխարհային հարցերով Խորհրդի ամբիոնից շտապել էր բարձրաձայնել Ադրբեջանի գլխավոր հյուպատոսը:

«Դուք խոսում եք հանդուրժողականության մասին և ասում եք, թե Հայաստանը բազմիցս «խախտել է» օրենքը: Այդ դեպքում, դուք ինչպե՞ս եք համաձայնեցնում ձեր հայտարարությունը ձեր նախագահի կողմից միջազգային իրավունքը լիովին անտեսելու իրողության հետ, երբ նախագահ Ալիևը հրաժարվել է հետևել բանտարկյալներին արտահանձման ենթարկելու միջազգային նորմերին, ներում շնորհել դատապարտված Ռամիլ Սաֆարովին՝ հերոսի կոչում շնորհելով մի մարդու և առհասարակ նրանց, ովքեր սպանում են հայերին, ինչպես նաև հայտարարում, որ հայերը համայն աշխարհում հանդիսանում են Ադրբեջանի թշնամիները», հարց է ուղղել ազերի հյուպատոսին հայ փաստաբանը:

Ղազարյանը շարունակել է իր ելույթը՝ մեջբերելով ԱՄՆ-ի նախագահ Բարաք Օբամային և Սպիտակ տան 2012թ. օգոստոսի 31-ի մամլո հաղորդագրությունը, որը հիշեցրել է ներկաներին Օբամայի դիտողությունները. «Ես խորապես անհագստացած եմ այս ներումով, Ադրբեջանի նախագահի արարքները հակասում են տարածաշրջանում լարվածության մեղմացմանն ու խաղաղության հաստատմանն ուղղված ջանքերին»: