«Ոչ տպավորիչ ծննդյան տոն չեմ ունեցել». Մարիաննա Հովհաննիսյան

Այսօր երգչուհի Մարիաննա Հովհաննիսյանը նշում է իր 21 ամյակը։ Ինչպես երգչուհին խոստովանեց Lurer.com-ին, դեռ երեկ գիշերվանից են սկիզբ առել շնորհավորանքները։ «Ինձ հարազատ մարդիկ սկսում են շնորհավորել 12-ից հետո։ Չեմ ցանկանում մանրամասնել, թե ինչպես և ինչ նվերներով, քանի որ ցանկացած նվեր արդեն իսկ շատ հաճելի է ու յուրահատուկ։ Իսկ ինչ վերաբերվում է երկրպագուներիս, ուրախ եմ, որ առիթների դեպքում հիմնականում համացանցի միջոցով շնորհավորում են»,-նշեց երգչուհին։

-Ո՞րն է եղել Ձեր ամենատպավորիչ ծննդյան տոնը և նվերը։

-Ոչ տպավորիչ ծննդյան տոն չեմ էլ ունեցել. ամեն տարի յուրօրինակ է եղել։ Ընկերներս միշտ հետաքրքիր բաներ են մտածում, որոնք տարբերվում են միշտ միմյանցից թե՛ տեսակային, թե՛ ոճային առումով, տեսքի, մտքի օրիգինալությամբ։

Եվ կապ չունի՝ ինչ կլինի նվերի բովանդակությունը։ Սիրում եմ, երբ գնելուց առաջ մտածում են, թե ում համար է նախատեսված և ինչ առիթով է։ Կարևոր է զգամ, որ հենց այնպես չի գնվել, քանի որ ես էլ եմ այդպես առաջնորդվում։ Ու քանի որ նվերներ շատ եմ սիրում, այսօր էլ անհամբեր սպասում եմ, թե ինչ հետաքրքիր մտքեր են նվերների վերածել իմ սիրելի մարդիկ։

-Իսկ սովորաբար սիրում եք այս օրը նշել մե՞ծ, թե՞ ավելի համեստ շրջանակում։

-Կախված է տրամադրություից։ Լինում է, որ ուզում եմ շատ շքեղ, կամ հակառակը՝ մտերմիկ միջավայրում։ Օրինակ՝ այս տարի ուզեցի ուղղակի մի հաճելի վայրում, նեղ շրջանակում երեկոյան նշել 21 ամյակս։ Ու թեև տանը չենք նշում, բայց ինչպես սովորաբար լինում է շատերիս մոտ, ծննդյան տոնին հաջորդող օրերը տունը միշտ լի է լինում հյուրերով։

-Իսկ 20 ամյակը ի՞նչ փոխեց Ձեր մեջ։

-Ամեն ծննդյան օրվան փորձում եմ նախորդ տարվա վերլուծությունն անել, ու ամեն անգամ որոշակի փոփոխություններ, իհարկե, տեսնում եմ, սակայն արժեհամակարգս ու տեսակետներս դժվար թե ժամանակը ի զորու լինի փոխել։ Իսկ ինձ համար կյանքում կարևորագույնը ընտանիքս է, ապա՝ կարիերաս և իհարկե՝ ընկերներս։

-Աշունը բավականին զգացմունքային եղանակ է, զգացմունքային տեսանկյունից ի՞նչ հոգեվիճակում եք հիմա։

-Աշունը սովորաբար տխուր է անցնում ինձ համար, բայց այս տարի, գուցե եղանա՞կն է պատճառը, շատ ուրախ է անցնում, ինչը նաև անդրադարձել է հոգեվիճակիս վրա։ Դրական ու այսօրվա եղանակի նման արևոտ, պայծառ ու հանգիստ է զգացմունքային աշխարհս։ Դրան նպաստել է նաև վերջերս Ֆրանսիա կատարած ճանապարհորդությունս, որից ստացած տպավորությունները դեռ թարմ են։

-Ո՞րն է առաջիկա մեկ տարվա Ձեր ամենաառաջնային նպատակը։

-Այս պահին նպատակներս կապված են միայն աշխատանքիս հետ։ Մինչ տարեվերջ գուցե հասցնեմ հանրության դատին ներկայացնել «Քեզ» երգի հիման վրա արդեն նկարահանված տեսահոլովակս։ Իսկ մյուս տարվա համար արդեն նախատեսված են երկու տեսահոլովակ և երկրորդ ձայներիզիս շնորհանդեսը։

Ռ.Հակոբյան

Լուսանկարները՝ Հրաչ Եղոյանի և երգչուհու անձնական արխիվից