Շատերի համար եկեղեցի գալը դարձել է նորաձև, որպեսզի հարսանեկան տեսաֆիլմը գեղեցիկ լինի. Քահանա

«Հայաստանում ամուսնալուծությունների հիմնական պատճառն այն է, որ հայ ընտանիքը կորցրել է իր արժեհամակարգը, կորցրել ենք նաև ընտանիքի ողնաշարը կազմող մեծ և փոքր հարաբերությունները։ Խզվել է սերունդների միջև մեր ավանդական կապը»։ Այս մասին լրագրողների հետ հանդիպմանն ասաց Իրավաբանների և հոգեբանների միջազգային ասոցիացիայի նախագահ Խաչատուր Մարոզյանը:

Բանախոսի խոսքով՝ այսօր հայ մարդը կորցրել է իր ուժերի նկատմամբ վստահությունը և ձեռք է բերել բացասական կոմպլեքսներ՝ չցանկանալով ամուսնանալ և ընտանիք կազմել։ «Եթե ինձ այսօր հարցնեին, թե մեր հասարակությունն ինչով է հիվանդ, ես կպատասխանեի՝ անվստահությամբ»,- ասում է Խաչատուր Մարոզյանը։

Մարոզյանի խոսքով՝ իրենք այսօր ունեն «Ընտանիքի ռազմավարություն» նախագիծ, որն իրագործելու համար դիմելու են Էջմիածին՝ բարոյական աջակցություն ստանալու համար, ինչպես նաև՝ կառավարությանը: Հրավիրելու են համագործակցելու բոլոր շահագրգիռ անձանց, որպեսզի իրականացնեն այդ ծրագիրը։

Ասուլիսի մյուս բանախոս Տեր Շմավոն քահանա Ղևոնդյանը, խոսելով նույն թեմայի շուրջ, նշեց. «Այսօր ընտանիք հասկացությունն իր նախկին արժեքը չունի, քանի որ ընտանիք ստեղծելու մոտեցումը փոխվել է, մարդկանց համար այն խաղ ու պար է դարձել:

Քահանայի կարծիքով՝ այս ամենի համար մեղավոր է և՛ պետությունը, և՛ հասարակությունը, և՛ այն ամենը, ինչը մատուցվում է հասարակությանը էկրանից, քանի որ մարդը տեսնում և սովորում է այն, ինչն իրեն հրամցվում է: Մարդկանց համար էլ դառնում է սովորական, որ կարող են ամուսնալուծվել զուտ նրա համար, ինչ է թե ուրիշի են սիրում։

«Մարդիկ գալիս են եկեղեցի պսակադրվելու, և զգացվում է, թե ինչքան հպանցիկ են նայում ամեն ինչին: Շատերի համար եկեղեցի գալը դարձել է նորաձև, որպեսզի հարսանեկան տեսաֆիլմը գեղեցիկ լինի։ Այն գիտակցությունը, որ ամուսնանալով ստեղծում է մի միություն, որն անքակտելի է, չկա»,-ավելացրեց քահանա Ղևոնդյանը։