ՄԻՊ-ը մշակել է խտարականության դեմ օրինագիծ

Ուրբաթ օրը հանդուրժողականության միջազգային օրվա կապակցությամբ «Հանրային տեղեկատվություն և գիտելիքի կարիք» ՀԿ-ն կազմակերպել էր քննարկում ՀՀ-ում հակախտրական օրենսդրության նախաձեռնման, մշակման և ջատագովության շուրջ: Այս մասին հայտնել են «Հանրային տեղեկատվություն և գիտելիքի կարիք» ՀԿ-ից՝ գրել է legalportal.am կայքը:

«Անվիճելի է, որ յուրաքանչյուրը պետք է իրական հնարավորություն ունենա օրինական միջոցներով պաշտպանելու սեփական իրավունքները՝ իր անձի հանդեպ խտրականության պարագայում: Հայաստանը միացել և վավերացրել է խտրականության վերացմանն ուղղված բոլոր միջազգային հիմնական իրավական գործիքները: Այդուհանդերձ, Հայաստանում խտրականության խնդիրը երբևէ հետևողականորեն չի քննարկվել, և անձի նկատմամբ խտրականության կիրառման կանխման և պատժման արդյունավետ իրավական մեխանիզմներ չկան: Այս համատեքստում հարկ է ձևավորել խտրականության, անհանդուրժողականության և այլատյացության կանխման, դրանց դրսևորումներին պատշաճ արձագանքնման գործուն մեխանիզմներ»,- նշել է կազմակերպության ղեկավար Մամիկոն Հովսեփյանը:

Կազմակերպության իրավաբան Լուսինե Ղազարյանը ՀՀ-ում հակախտրական օրեսնդրություն ունենալու անհրաժեշտությունը հիմնավորել է Հայաստանում գործող օրենքներում առկա բացերով, ինչպես նաև միջազգային ստորագրված և վավերացված կոնվենցիաներով և հանձնարարականներով:

Այնուհետ ՀՀ մարդու իրավունքների պաշտպանի աշխատակազմի հաշմանդամների և փոքրամասնությունների իրավապաշտպան Տաթևիկ Խաչատրյանն ու իրավական վերլուծության վարչության պետի ժամանակավոր պաշտոնակատար Արամ Վարդևանյանը նշել են, որ ՄԻՊ գրասենյակի կողմից արդեն իսկ մշակվել է հակախտրական օրենքի նախագծի նախնական տարբերակը, ինչպես նաև ներկայացրել են ՄԻՊ գրասենյակի դիրքորոշումը այս օրենսդրության անհրաժեշտության և կարևորության վերաբերյալ:

Իրավապաշտպան կազմակերպությունների ներկայացուցիչները քննարկման ընթացքում իրենց մտահոգությունն են հայտնել այն փաստի շուրջ, որ ՄԻՊ աշխատակազմի կողմից մշակված հակախտրական օրենքի նախագծի մշակումը տեղի չի ունեցել թափանցիկ պայմաններում և հանրության մասնակցությամբ:

Հանդիպման ավարտին քննարկմանը ներկա կազմակերպությունները վերահաստատել են անհրաժշետությունը՝ առավել անմիջական և ակտիվ ներգրավվածություն ունենալու այդ օրինագծի մշակման հետագա փուլերում, ինչի համար ՄԻՊ-ի գրասենյակին պահանջ է ներկայացվել' երաշխավորելու նրանց գործունեության թափանցիկությունն ու հանրայնացումը, ինչպես նաև ՀԿ-ներին կոչ է արվել համախմբել ջանքերը առավել համընդգրկուն հակախտրական օրենսդրության նախագիծ ունենալու և դրա ադվոկացիան իրականացնելու համար:

«Իրական աշխարհ, իրական մարդիկ» ՀԿ ներկայացուցիչ Հովհաննես Մադոյանը նշել է, որ քաղաքացիական հասարակության կազմակերպությունները ՄԻՊ գրասենյակի հետ համատեղ կմասնակցեն օրենքի նախագծի մշակման գործընթացին, որպեսզի երաշխավորեն ոլորտում առկա հիմնախնդիրներին արձագանքող համապարփակ օրենսդրական նախագծի առկայություն: