«Ազատության քայլերթ» հանուն ազատության

Այսօր` նոյեմբերի 17-ին, Խնկո Ապոր անվան ազգային մանկական գրադարանի մոտից մեկնարկեց «Ազատության քայլերթ» խորագրով երթը: Երթի մասնակիցները քայլեցին Տերյան-Սայաթ Նովա-Մաշտոցի պողոտա-Ամիրյան-Հանրապետության հրապարակ-Հյուսիսային պողոտա-Տերյան երթուղով:

Մասնակիցների ձեռքերին կային տարբեր գրություններով պաստառներ. «Սարգիս, մենք քեզ հետ ենք», «Խուլիգան ոստիկաններ», «Դուք դեռ ազատության մե՞ջ եք», «Ազատ Հայաստան», «Պատժել դատավորներին», «Պայքար հանուն ազատության», «Ո´չ քաղաքական հետապնդումներին»:

ԱԺ ՀԱԿ խմբակցության պատգամավոր Լևոն Զուրաբյանն իր ելույթի ընթացքում նշեց, որ մեկնարկի վայրը խորհրդանշական է, քանի որ հենց այստեղ է տեղի ունեցել ՀԱԿ ակտիվիստների և ոստիկանների միջև բախումը: Լևոն Զուրաբյանը նկատեց նաև, որ հենց այդ ժամանակ էին  իշխանության և ընդդիմության միջև բանակցություններ ընթանում:

«Տղաների դեմ այս ոտնձգությունը ցույց է տալիս, որ այստեղ յուրաքանչյուրս այս հանցավոր իշխանության կողմից  դատապարտված ենք անդադար լինել ոչ ադեկվատ վերաբերմունքի թիրախ: Ուստի այսօր տղաների ազատությանը հասնելու համար պետք է պատրաստ լինել ամեն քայլի, յուրաքանչյուր կեղծիքի դեմ», – իր ելույթում նշեց ՀԱԿ անդամ, դերասան Աշոտ Ադամյանը:

Ակցիան իրականացվեց «Հայաստանն առանց քաղբանտարկյալների» նախաձեռնության կողմից:

Հիշեցնենք, որ նոյեմբերի 13-ին վերաքննիչ դատարանը օրինական ուժի մեջ թողեց առաջին ատյանի որոշումը, որով ՀԱԿ ակտիվիստներ Տիգրան Առաքելյանը դատապարտվել էր 6, Արտակ Կարապետյանը՝ 3, իսկ Սարգիս Գևորգյանն ու Դավիթ Քիրամիջյանը՝ 2-ական տարվա ազատազրկման։