The Beatles-ի լուսանկարիչ. Ես նրանց կերակրեցի, նրանք էլ համաձայնվեցին լուսանկարվել

«Նրա լուսանկարները բուրում են կենդանի «Բիթլներով»»,-այսպես էին արտահայտվում Աստրիդ Կիրհերի մասին մարդիկ:

74-ամյա Աստրիդ Կիրհերը Կիև էր բերել հայտնի կադրեր, որոնց վրա պատկերված էին երիտասարդ Beatles-ները:

Կիհերը պատմել է, որ «հիվանդացել» է «Բիթլներով» 1960-ականների սկզբին. «Իմ ընկերը՝ Կլաուս Ֆորմանը, մի անգամ մտավ մութ ձեղնահարկ և այնտեղ գտավ տղաներին, ովքեր նվագում էին երաժշտական գործիքների վրա: Կլաուսը բառացի ստիպեց ինձ գնալ և տեսնել նրանց: Երբ ես տեսա, մնացի քարացած նրանց կատարումից:

Այդ ժամանակ ես շատ վատ էի խոսում անգլերեն, ուստի որոշակի ժամանակ պահանջվեց տղաների հետ շփման մեջ մտնելու համար: Իմ ուշադրությունը հատկապես գրավեց կիթարահարը՝ Ստյուարտ Սաթկլիֆը: Շուտով ես սիրահարվեցի նրան, ու սկսեցի չնկատել մնացածներին»:

Եվ որպեսզի երաժշտի ուշադրությանն արժանանա, Աստրիդը խորամանկության է դիմել. «Ես հրավիրեցի տղաներին իմ տուն՝ լուսանկարելու, բայց գլխավոր նպատակս մեկն էր՝ ավելի մոտիկից ծանոթանալ իմ երազանքներից գլխավորի հետ: Մայրս, ով ևս տարված էր տղաներով, ինձ հուշեց, որ նախ նրանց հրավիրեմ մեզ մոտ ճաշի: Նա պատրաստեց ինչ-որ անգլիական ավանդական ուտեստ՝ լոբով և կարտոֆիլով: Հիշում եմ՝ առաջինը, ով վազեց խոհանոց, Ջոն Լենոնն էր: Նա միանգամից մորս հետ մտերմացավ:

Ճաշից հետո, ես տղաներին ասացի, որ ցանկանում եմ նրանց միասին լուսանկարել»:

Աստրիդն ու Ստյուարտը ամուսնացան 1960 թվականին: Սակայն ամուսնությունից ընդամենը երկու տարի անց Սաթկլիֆի առողջությունը սկսեց վատթարանալ: Նա հաճախ գանգատվում էր գլխացավերից, սակայն բժիշկները ոչ մի կերպ չէին կարողանում բացատրել՝ ինչու: Նա մահացավ հիվանդանոցի ճանապարհին՝ Աստրիդի գրկում: