Դիլիջանում վրաերթի են ենթարկել Ազգային պարկի 3 աշխատակցի. կա 1 զոհ, 2 վիրավոր

Այսօր՝ նոյեմբերի 18-ին, վրաերթ է տեղի ունեցել Տավուշի մարզում: Ժամը 18.50-ի սահմաններում Թեղուտ գյուղի բնակիչ 37-ամյա Վարդան Մուկուչյանը, վարելով «Վազ 2121» մակնիշի 07 ՍԼ 222 համարանիշի ավտոմեքենան, Դիլիջան-Վանաձոր ավտոճանապարհի 1-ին կմ հատվածում վրաերթի է ենթարկել Դիլիջան քաղաքի բնակիչներ՝ 34-ամյա Էդիկ Ալիխանյանին, 43-ամյա Սպարտակ Եսայանին և 31-ամյա Վարդան Սարգսյանին:

Ինչպես հայտնում է shamshyan.com–ը, վրաերթի ենթարկվածները տեղափոխվել են Դիլիջանի բժշկական կենտրոն: Ֆոտոլրագրողը հայտնում է, որ հիվանդանոցում քիչ առաջ Ս. Եսայանը մահացավ: Գ. Շամշյանը հայտնում է, որ վրաերթի ենթարկված 3 քաղաքացիներն էլ Դիլիջանի Ազգային պարկի աշխատակիցներ են:

Վրաերթի վայր են ժամանել Ճանապարհային ոստիկանության 2-րդ սպայական գումարտակի 4-րդ վաշտի աշխատակիցները՝ վաշտի հրամանատար Սերգեյ Հակոբյանի գլխավորությամբ: Տեղում են նաև Ոստիկանության Դիլիջանի բաժնի օպերատիվ քննչական խումբը՝ քննիչ Սմբատ Սաղաթելյանի գլխավորությամբ:

Փաստի առթիվ Ոստիկանության քննչական գլխավոր վարչության Տավուշի մարզի քննչական բաժնի Դիլիջանի քննչական բաժանմունքում նյութեր են նախապատրաստվում:

Քննիչի հանձնարարականով ավտոմեքենան տեղափոխվել է Ոստիկանության Դիլիջանի բաժնի հատուկ պահպանման տարածք: