Նաև հայերի աջակցությունը ստացած քուրդ բանտարկյալները դադարեցրել են հացադուլը. Der Standard

Քուրդիստանի աշխատավորական կուսակցության ձերբակալված ղեկավար Աբդուլլահ Օջալանի կոչով քուրդ բանտարկյալները դադարեցրել են իրենց հացադուլը, որն արդեն 2 ամսից ավել ընթանում էր: Նվազագույնը նրանք կարողացան հասնել մասնակի հաղթանակի. գրում է ավստրիական պարբերականը:

Ընդհանուր առմամբ՝ Թուրքիայի բանտերում գտնվող ավելի քան 700 քուրդ բանտարկյալ էր մասնակցում 68 օր տևած այս հացադուլին: Շարժման խոսնակներից մեկը՝ Դենիզ Կայան, քրդամետ Firatnews գործակալությանը հայտնել է, որ իր եղբայր Մեհմեդը ցմահ բանտարկության է դատապարտվել, և որ Քուրդիստանի աշխատավորական կուսակցության հիմնադիր Օջալանը հանդիպել է նրա հետ բանտում և նրան գրավոր բացատրություն հանձնել: Նրանում ասվում է. «Մենք հասել ենք նպատակին, և այժմ պետք է անհապաղ ու անտարակույս դադարեցնել հացադուլը»: Ակցիայի մասնակիցները, ամենից զատ, պահանջում էին բարելավել իրենց առաջնորդ Աբդուլլահ Օջալանի բանտային պայմանները և դատարանում մայրենի քրդերեն լեզվով հանդես գալու իրավունք ստանալ:

Հացադուլը սկսվել էր սեպտեմբերի 12-ին մոտ 60 բանտարկյալների կողմից: Աստիճանաբար բանտարկյալներին էին միացել Թուրքիայում գտնվող այլ կալանավորներ: Բժիշկների գնահատմամբ՝ սովահարության հետևանքով նրանցից մի քանիսի կյանքին լուրջ վտանգ է սպառնում:
Թուրքիայի վարչապետ Ռեջեփ Թայիփ Էրդողանը հացադուլը շոու է որակել և անվանել քաղաքական ճնշում: Սակայն նրա կառավարությունը պատրաստակամություն է հայտնել հարցին լուծում տալ: Արդարադատության նախարարը հանդիպել է քրդական կուսակցության ներկայացուցիչների հետ, որոնք աջակցում էին քուրդ բանտարկյալների հացացուլը: Անցյալ շաբաթ պահպանողական իսլամիստական «Արդարություն և զարգացում» իշխող կուսակցության կողմից խորհրդարանին է ներկայացվել օրենքի մի նախագիծ, որով քուրդ բանտարկյալներին թույլատրվելու է մայրենի լեզվով ելույթ ունենալ դատարանի առջև:

«Քուրդիստանի աշխատավորական կուսակցությունը» ԵՄ-ի, ԱՄՆ-ի և Թուրքիայի կողմից ճանաչվել է որպես ահաբեկչական խմբավորում: Քրդական կազմակերպությունները բողոքում են իրենց ժողովրդի նկատմամբ ողջ Թուրքիայի տարածքում կիրառվող էթնիկ խտրականության դեմ: