Իսրայելն ու ՀԱՄԱՍ-ը հրադադարի շուրջ բանակցություններ են սկսել

Իսրայելի և ՀԱՄԱՍ-ի պատվիրակությունները Եգիպտոսի միջնորդությամբ բանակցություններ են վարում հրադադարի նպատակով. այս մասին հաղորդում են Կահիրեի դիվանագիտական աղբյուրները։ Քննարկումը մեկնարկել էր կիրակի օրը, սակայն առայժմ որևէ համաձայնություն ձեռք չի բերվել, թեպետ Եգիպտոսի ներկայացուցիչները մոտալուտ հաշտեցումը չեն բացառում։

Իսրայելի վարչապետ Բինիամին Նեթանյահուն նախօրեին կրկին հայտարարել էր, որ Իսրայելը կքննարկի խաղաղ տարբերակը միայն այն ժամանակ, երբ ահաբեկիչները կդադարեցնեն հրեական հանրապետության ռմբակոծումը։ Մինչդեռ հակամարտության խաղաղ լուծման ուղիների որոնմանը միացել է նաև Եվրոպան։ Մեկնարկել է Ֆրանսիայի արտաքին գործերի նախարար Լորան Ֆաբիուսի այցը Մերձավոր Արևելք։

«Մենք չափազանց մտահոգ ենք առ այն, որ տարածաշրջանում լարվածությունը սաստկանում է։ Մենք՝ ֆրանսիացիներս, կցանկանայինք նվազեցնել լարվածությունը»։

Իսկ նախօրեին Ֆրանսիայի արտաքին գերատեսչության ղեկավարը բանակցություններ է վարել Պաղեստինյան ինքնավարության ղեկավարության հետ՝ կոչ անելով հակամարտող բոլոր կողմերին վերջ դնել բռնությանը։