Եզրագծից այն կողմ. «Հայոց Արծիվների» 267-րդ Արծվատունը

Lurer.com-ի հարգելի՛ ընթերցողներ, օրերս Արագածոտնի մարզի մի քանի գյուղերում «Հայոց Արծիվներ» հայրենասիրական-հասարակական կազմակերպության («Հայոց Արծիվներ» ՀՀԿ-ի) կողմից բացվել է ևս 4 արծվաբույն՝ ի բարօրություն Հայոց պետականության, Ազգային բանակի, Հայոց նախագահի: «Հայոց Արծիվներ» ՀՀԿ-ի տեղեկատվության և հասարակայնության հետ կապերի հանձնաժողովի կողմից մեզ ուղարկված մամլո հաղորդագրությունը ներկայացնում ենք ստորև՝ ի բարօրություն Հայոց պետականության, Ազգային բանակի, Հայոց նախագահի.

«Հայոց Արծիվներ» հայրենասիրական հասարակական կազմակերպության Նախագահությունը Կազմակերպության առաջնորդ Խաչիկ Ասրյանի գլխավորությամբ անցած շաբաթ գտնվում էր Արագածոտնի մարզում, որտեղ պաշտոնապես բացվեց Կազմակերպության 4 մասնաճյուղեր-գրասենյակներ:

«Հայոց Արծիվներ» հայրենասիրական հասարակական կազմակերպության մասնաճյուղեր-գրասենյակների թիվը դարձավ 267:

Արագածոտնի մարզի Օհանավան, Ալագյազ, Մելիքգյուղ և Կայք /Մուլքի/ գյուղական համայնքներում բնակիչները աղ ու հացով, զուռնա-դհոլով, մեծ ոգևորությամբ դիմավորեցին «Հայոց Արծիվներին»: ՀՀ սպորտի և երիտասարդության հարցերի փոխնախարար, «Հայոց Արծիվներ» հայրենասիրական հասարակական կազմակերպության առաջնորդ Խաչիկ Ասրյանը իր ոգեշունչ ելույթների ժամանակ խիստ կարևորեց «Հայոց Արծիվների» որդեգրած գաղափարախոսության և կարգախոսի դերն ու նշանակությունը հայ հասարակության շրջանում՝ միաժամանակ կարևորելով հայ մարդու, հայ ընտանիքի և ընդհանուր առմամբ հայ հասարակության անմիջական մասնակցությունը հայոց պետականության հզորացման գործընթացներին:

Խաչիկ Ասրյանը ներկայացնելով Կազմակերպության գաղափարախոսությունը, նշեց, որ գյուղապահպանությունը, արտագաղթի կանխումը, ՀՀ քաղաքացու արժանապատվության պահպանումը ուղղակի մասն են կազմում ազգային-պետական-հայրենասիրական գաղափարախոսության:

Խաչիկ Ասրյանը կարևորեց նաև «Հայոց Արծիվների» գործունեության դերն ու նշանակությունը հայ հասարակության շրջանում և կոչ արեց բոլորին համախմբվել միասնության տանիքի՝ ազգային բանակի, հայոց Նախագահի, Հայաստանի Հանրապետության շուրջը՝ միշտ ավելի ուժեղ, ավելի հզոր, ավելի միասնական լինելու համար:

«Հայոց Արծիվների» առաջնորդ Խաչիկ Ասրյանը խոսեց նաև հասարակության շրջանում մուտք գործած արատավոր երևույթների, այդ թվում նաև աղանդների մասին, և խստագույնս դատապարտելով՝ կոչ արեց գաղափարական պայքար սկսել այդ արատավոր երևույթների դեմ:

«Հայոց Արծիվներ» հայրենասիրական հասարակական կազմակերպության Նախագահությունը գյուղական համայնքների միջնակարգ դպրոցներին հատկացրեց նաև մարզագույք:

Խաչիկ Ասրյանը իր բոլոր հանդիպումների ժամանակ խորին երախտագիտություն հայտնեց բնակիչներին' ջերմ ընդունելության համար:
«Հայոց Արծիվներ» ՀՀԿ Նախագահությունը Արագածոտնի մարզում այցելեց նաև զոհված ազատամարտիկների հուշարձաններ և «Սուրբ Կարապետ» եկեղեցի:

«Հայոց Արծիվներ» հայրենասիրական հասարակական կազմակերպությունը, որդեգրելով ազգային-պետական-հայրենասիրական գաղափարախոսությունը, «Հայոց Պետականություն, Ազգային Բանակ, Հայոց Նախագահ» կարգախոսը, իր հիմնադրման օրվանից' 27.01.2010 թվականից մինչև այսօր իրականացրել է 473-ից ավելի հայրենասիրական, ռազմահայրենասիրական բազմաբովանդակ միջոցառումներ, հիմնադրել է 267 մասնաճյուղեր-գրասենյակներ՝ Հայաստանի Հանրապետության 24 քաղաքային և 243 գյուղական համայնքներում: Կազմակերպությանը կամավոր հիմունքներով անդամագրվել է ավելի քան 28.000 մարդ:

«Հայոց Արծիվներ» ՀՀԿ տեղեկատվության և հասարակայնության հետ կապերի հանձնաժողով