Ինչո՞ւ է ԲՀԿ-ն սատարում ՀՀԿ թեկնածուին. Մեկնաբանում է խոսնակը

Գյումրու քաղաքապետ Սամվել Բալասանյանը թիվ 35 ընտրատարածքում կսատարի պատգամավորի թեկնածու, ՀՀԿ-ական Արման Սահակյանին: Այս մասին Lurer.com-ի հետ զրույցում ասաց քաղաքապետի մամուլի խոսնակ Զոհրապ Եգանյանը։

Վերջինիս խոսքով՝ Արման Սահակյանն այն թեկնածուն է, ով կարող է կիսատ մնացած գործերն ավարտին հասցնել։ «Հույս ունենք և վստահություն կա մեր մեջ, որ Արման Սահակյանը կարող է Սամվել Բալասանյանի թողած կիսատ մնացած գործերը վերջնագծին հասցնել, նոր գործերի սկիզբ դնել»,-ասաց Զոհրապ Եգանյանը։

Տեղեկացնենք նաև, որ Գյումրու թիվ 35 ընտրատարածքում առաջադրված թեկնածուներն են ՀՀԿ-ական Արման Սահակյանը և «Հայ ազգային կոնգրես»-ից Մուրադ Գրիգորյանը:  

Ուշագրավ է այն, որ ներկա քաղաքական իրավիճակում, երբ ՀԱԿ-ԲՀԿ ակտիվ համագործակցություն է ընթանում, ԲՀԿ-ական քաղաքապետը սատարում է ՀՀԿ-ական թեկնածուին։

Պարզելու համար՝ արդյոք ՀՀԿ թեկնածուին սատարելու գաղափարը պատկանում է միայն Սամվել Բալասանյանին, թե «Բարգավաճ Հայաստան» կուսակցության որոշումն է, Lurer.com-ը կապ հասատեց ԱԺ ԲՀԿ խմբակցության պատգամավոր Տիգրան Ուրիխանյանի հետ, ով մեզ հետ զրույցում նշեց. «Քանի որ ԲՀԿ-ն այդպես էլ թիվ 35 ընտրատարածքում թեկնածու չառաջադրեց, հետևաբար որևէ մեկին սատարելու խնդիր չի տեսնում, բայց տարածքային կառույցը իրավասու է սեփական որոշում կայացնելու և սատարելու է ՀՀԿ-ի թեկնածուին։ Քանի որ քաղաքապետի ընտրությունների ժամանակ Հանրապետականի տարածքային կառույցը սատարել է Սամվել Բալասանյանին և ծրագրերի իրականացման առումով տարածաշրջանում ինչ-ինչ նպատակներ ունի, դրանից ելնելով՝ տարածքային կառույցը որոշում է կայացրել և իրավասություն է ստացել առանձին որոշում կայացնելու և սատարելու ՀՀԿ-ի թեկնածուին։

Լրագրողի այն դիտարկմանը, թե հերթականություն է դարձել՝ ՀՀԿ-ն սատարում է ԲՀԿ-ին, ԲՀԿ-ն՝ ՀՀԿ-ին, Տիգրան Ուրիխանյանն ասաց. «Դուք տվեցիք հարց, ես տվեցի կոնկրետ պատասխան, այսինքն-ով սկսվող նախադասությունները տեղին չեն»։ 

 Նելլի Ավետիսյան