Ջասթին Բիբերը ճանաչվել է «տարվա արտիստ»

Ջասթին Բիբերը ստացել է American Music Awards-ի գլխավոր մրցանակներից մեկը։ Հանրահայտ 18-ամյա երգիչը արժանացել է «տարվա արտիստ» մրցանակին։ Նա նաև ստացել է ամենահայտնի փոփ-ռոք կատարողի տիտղոսը։

Նշենք, որ Բիբերն առաջին անգամ չէ որ ստանում է այս մրցանակը։ Այս մրցանակին նա արժանացել էր նաև 2010-ին. այդուամենայնիվ անցյալ տարի երգիչն անգամ չմտավ ամերիկյան հեռուստալսարանի առաջատարների հնգյակի մեջ։

«Լավագույն նոր արտիստ» մրցանակին արժանացել է Կարլի Ռեյ Ջեպսենը, իսկ Քեթթի Փերին ճանաչվել է լավագույն փոփ-ռոք երգչուհի։ Հայտնում է news.guru.ua-ն։

Ջասթին Բիբերը մեծ ճանաչում գտավ YouTube-ում հայտնված այն տեսահոլովակների պատճառով, որոնցում նա կատարում էր RnB ոճում գրված իր հեղինակային կատարումները։ Այս պահին արտիստն արդեն ունի երեք ալբոմ, որոնք վաճառվել են մոտավորապես 15 մլն օրինակով։