Եթե ՀՀԿ-ն սեփական թեկնածուն չունենար, կարող էր պաշտպանել Անուշ Սեդրակյանի թեկնածությունը

«Ազատ դեմոկրատները» լիբերալ ֆրոնտի ներկայացուցիչ է և ամբողջ դաշտը վերցնելու հավակնություն ունի։ Այսօր լրագրողների հետ հանդիպմանն ասաց «Ազատ դեմոկրատներ» կուսակցության անդամ Անուշ Սեդրակյանը։

Նրա խոսքերով՝ այդ դեպքում բանական է, որ պետք է քննարկվի նախագահական ընտրություններում կին թեկնածու ունենալու հարցը:

«Ազատ դեմոկրատներ»-ը քննարկում է այդ հարցը»,-ասաց Սեդրակյանը:

Ասուլիսի մյուս բանախոս ՀՀԿ-ական Արտակ Դավթյանն ասաց, որ «Ազատ դեմոկրատներից» կարող է ի հայտ գալ կին թեկնածու.

«Կանայք կարևոր դեր են կատարել մեր պատմության մեջ: Հայ կինը միշտ աջակցել է հայ տղամարդուն, եթե եղել է դրա անհրաժեշտությունը: Ես ողջունում եմ այդ գաղափարը: Դա բավականին լավ ժեստ կլինի: Եթե ՀՀԿ-ն սեփական թեկնածուն չունենար, ինչու չէ, կարող էր պաշտպանել Անուշ Սեդրակյանի թեկնածությունը»,-ասաց ՀՀԿ-ականը:

«Ազատ դեմոկրատներ»-ի ներկայացուցիչ Սեդրակյանն ասաց, որ այսօր քննարկումները հիմնականում ընթանում են երեք նախագահների եռանկյունու ֆորմատում։ Ըստ նրա՝ թեկնածուների այս մրցավազքում պետք է սկսվեր քաղաքական գործառույթների քննարկում:

«Իշխանության թեկնածուն գործող նախագահն է, ով վերընտրվելու միտում ունի: Պետք է ռեալ սահմանազատում դնել ռեալ ընդդիմության և նոր-նոր ընդդիմություն դարձող ուժի միջև»,-նկատի ունենալով ԲՀԿ-ին՝ ասաց Սեդրակյանը։

Իսկ ՀՀԿ-ական Դավթյանն ասաց, որ ընդդիմությունը պետք է մատնանշի՝ ինչպես լուծել երկրում առկա խնդիրները: «Դաբրոների տեսության» կողմնակիցները չեն կարողանում ազատվել այդ մտայնությունից:

Սրան ի պատասխան՝ Սեդրակյանն ասաց, որ երբեմն ընտրողին կանգնեցնում են վատի և վատթարագույնի միջև: Պետք է թափանցիկ դարձնել քաղաքական գործընթացները: