Որտեղ են արտացոլվում հայաստանյան ներքաղաքական զարգացումների միտումներն ու տրամաբանությունը

Համլետ Կիրակոսյանը Facebook սոցցանցի իր էջում գրել է.

Երբ դեռ ամիսներ առաջ ասում էինք, որ Գյումրիում տեղի ունեցող քաղաքական բնույթի իրադարձություններն արտացոլում են հայաստանյան ներքաղաքական զարգացումների միտումներն ու տրամաբանությունը, չափազանցություն չէր: Իրոք, դրանցով կարելի է պատկերացում կազմել, թե ինչ է կատարվում եւ ինչ կարող է կատարվել երկրի քաղաքական դաշտում:

Կոնկրետ այդ ժամանակ խոսքը վերաբերում էր նրան, որ իշխող ՀՀԿ-ն Գյումրու քաղաքապետի պաշտոնում չառաջադրեց սեփական թեկնածու, չթույլատրեց առաջադրվել ՀՀԿ-ական գործող քաղաքապետին, այլ սատարեց արդեն այդ ընթացքում ՀՀԿ-ին ընդդիմացող ու նրա դեմ «մեծ կռվի» պատրաստվող ԲՀԿ-ի թեկնածուին: Ավելին, Սերժ Սարգսյանն հայտարարեց, թե Սամվել Բալասանյանին ինքն է առաջարկել առաջադրվել: Փաստորեն, Գյումրու այսօր գործող քաղաքապետին կարելի է ընկալել ԲՀԿ-ա-ՀՀԿ-ական միացյալ պաշտոնյա, քանի որ ՀՀԿ-ի աջակցությունը նրան սոսկ սովորական սատարում չէր, այլ ընդգծված քաղաքական դիրքորոշում, քայլ ու հաշվարկ:

Հայաստանյան քաղաքակական ներկայիս իրականության գյումրիական արտացոլանքը շարունակվում է: Քաղաքապետ Սամվել Բալասանյանը թիվ 35 ընտրատարածքում կսատարի պատգամավորի թեկնածու, ՀՀԿ-ական Արման Սահակյանին: Սա այն դեպքում, երբ այդ պատգամավորական տեղի համար պայքարում է նաեւ ԲՀԿ-ի ներկայիս գործընկեր, Կոնգրեսի ներկայացուցիչ Մուրադ Գրիգորյանը: