Նոր հայալեզու տեղեկատվական կայք նրանց համար, ովքեր ուզում են սովորել

Երկուշաբթի օրը ՎիվաՍել-ՄՏՍ ընկերության գրասենյակում տեղի է ունեցել «Պաշարների շտեմարան» կայքի շնորհանդեսը, որին ներկա էին ՀՀ կրթության նախարար Արմեն Աշոտյանը և ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանը:

Հիշեցնենք, որ այս տարվա սկզբին ԿԳՆ-ի և ընկերության միջև համագործակցության պայմանագիր էր ստորագրվել, որի արդյունքներից մեկն էլ հենց կայքի ստեղծումն է:

ՀՀ ԿԳ նախարար Արմեն Աշոտյանը շնորհանդեսի ժամանակ նշեց, որ կայքով կընդլայնվի համացանցում հայալեզու բովանդակության ծավալը, որն օգտակար կլինի նաև մարզային աշակերտների և ուսուցիչների համար, ինչպես նաև սփյուռքահայերի համար:

«Պաշարների շտեմարանի» ստեղծման նպատակը կրթության ոլորտում Տեղեկատվական և հաղորդակցական տեխնոլոգիաների (ՏՀՏ) ներդրման շարունակական զարգացման ապահովումն է, մասնավորապես՝ էլեկտրոնային բովանդակության հարստացումը և ուսումնամեթոդական պաշարների միասնական տարածքի ստեղծումը: Կայքն ունի տարբեր բաժիններ, բազմաստիճան համակարգ: Պաշարներին կարելի է կցել նաև անսահմանափակ քանակով տեսանյութեր և այլ նյութեր: Այն ունի սոցիալական ցանցերում տարածման հնարավորություն, վարկանիշային սյունակ: Կայքն ունի ուսումնական ձեռնարկներ, մեթոդաբանական նյութեր, վիճակագրական տվյալներ, ուսումնական նյութեր, դասագրքեր և այլն:

Կարելի է գրանցվել ու ընդամենը մի քանի գործողությամբ կայքում տեղադրել Ձեր սեփական նյութերը, մեկնաբանել ու գնահատել գոյություն ունեցողները: Առանց գրանցվելու հնարավորություն կա ներբեռնելու, ուսումնասիրելու և օգտագործելու կայքում տեղադրված պաշարները:

«Պաշարների շտեմարան» հայալեզու կայքը «Հայկական կրթական միջավայր» պորտալի ենթակայքերից մեկն է:

«Պաշարների շտեմարան» կայքը պատրաստվել է ՎիվաՍել–ՄՏՍ–ի հովանավորությամբ։

Ահա «Պաշարների շտեմարան» կայքի հասցեն՝ lib.armedu.am:

Գոռ