ԱԻՆ-ի միջազգային կապերն ակտիվանում են

Այսօր ՀՀ ԱԻ նախարարությունում տեղի ունեցավ ղեկավար կազմի հերթական ամենշաբաթյա խորհրդակցությունը, որը վարեց նախարար Արմեն Երիցյանը։

ԱԻՆ փրկարար ծառայության տնօրեն, գեներալ-մայոր Ս. Ազարյանը նախարարին զեկուցեց շաբաթվա ընթացքում գրանցված արտակարգ պատահարների և ձեռնարկված միջոցառումների մասին։

Հիդրոմետ ծառայության տնօրեն Լ. Վարդանյանը տեղեկացրեց, որ վերջերս ձեռք բերված 500 նոր զոնդերը համապատասխան ծրագրային ապահովմամբ արդեն իսկ շահագործվում են։ Այժմ համակարգը կապահովի մթնոլորտի զոնդարկում օրական մեկ անգամ, իսկ ստացված տվյալների օգտագործումը կբարելավի եղանակի կանխատեսման արդարացվածության մակարդակը:

Վերջերս ԱԻ նախարարություն էին այցելել Հայաստանում Միացյալ Թագավորության դեսպան Քեթի Լիչը և ՆԱՏՕ-ի միջազգային անձնակազմի աշխատակից Ստեֆեն Էլգերսմանը, ովքեր ցանկություն էին հայտնել ծանոթանալ նախարարության գործունեությանը, մասնավորապես Ճգնաժամային Կառավարման Կենտրոնի աշխատանքին։ Հանդիպում էր տեղի ունեցել նաև Վրաստանում Ֆրանսիայի Հանրապետության դեսպանատան անվտանգության հարցերով կցորդ Ստեֆան Ռոպերսի հետ:

Արտաքին կապերի վարչության պետ Մ. Գևորգյանը տեղեկացրեց, որ Միացյալ Թագավորության դեսպանատնից հայտնել են, որ նոյեմբերի 27-ին մեծ պատվիրակություն է գալու ԱԻՆ-ի հետ համագործակցությունը շարունակելու նպատակով։

Հակակարկտային ծառայության տնօրեն Ռ. Հովսեփյանը զեկուցեց, որ սկսվել են կայանների կոնսերվացման աշխատանքները։

ՓԾ տնօրենի տեղակալ, գնդապետ Ն. Գրիգորյանը տեղեկացրեց, որ արդեն հայտարարված է փրկարար ծառայության օպերատիվ կառավարման վարչության ճգնաժամային կառավարման կենտրոնում հաշմանդամություն ունեցող անձանց աշխատանքի ընդունման մրցույթը և մոտակա օրերին ներկայացված պահանջներին համապատասխան դիմում-հայտերի հիման վրա բանավոր հարցազրույցի կհրավիրվեն մրցույթին դիմած քաղաքացիները։

ՓԾ տնօրենի տեղակալը հայտնեց նաև, որ նոյեմբերի 9-ից 17-ը Հայաստանում էր Շվեյցարիայի միջազգային զարգացման և համագործակցության գործակալության փորձագետ Անտոն Բյիլանգը: Այցի շրջանակներում քննարկվեց համատեղ «Արագ արձագանքման միջին փրկարարական թիմերի ստեղծումը շրջաններում» պիլոտային ծրագրի իրականացման խնդիրը, որի իրականացման արդյունքում Երևանում, Շիրակի և Սյունիքի մարզերում ստեղծվելու են INSARAG–ի չափանիշներին համապատասխան միջին փրկարարական թիմեր, որոնք կարող են արձագանքել խոշոր աղետներին և իրականացնել փրկարարական աշխատանքներ:

Նախարարին զեկուցեցին նաև, որ ՃԿԿ-ից ուղիղ կապ է ստեղծվել Ղարաբաղի հրշեջ-մասերի հետ։