Քաղաքագետների և միջազգայնագետների համաժողով Երևանում

ՀՀ սփյուռքի նախարարության հրավիրած «21-րդ դարի մարտահրավերները և Հայաստանի անվտանգության հիմնախնդիրները» խորագրով քաղաքագետների և միջազգայնագետների համաժողովի «Հայաստանին ուղղված մարտահրավերները գլոբալացվող աշխարհում» թեմայով առաջին նիստն ավարտվեց:

Նիստը բացվեց ‹‹Նորավանք›› հիմնադրամի գործադիր տնօրեն Գագիկ Հարությունյանի «Հայաստանի անվտանգության հիմնախնդիրները գլոբալացվող աշխարհում» ելույթով:

Բոստոնի համալսարանի ժամանակակից հայոց պատմության և գրականության ամբիոնի ղեկավար, ցեղասպանագետ Սիմոն Փայասլյանը ներկայացրեց մարդու իրավունքների միջազգային օրենքների արդյունավետ կիրարկումը և Հայաստանին ուղղված մարտահրավերները 21-րդ դարում:

Ֆրանսիայից ժամանած ԱՄՆ-ի և Հարավային Կովկասի միջև հարաբերությունների փորձագետ Ժուլիեն Զարիֆյանը զեկուցեց 1991թ. Հայաստանի անկախության ձեռքերումից ի վեր Հարավային Կովկասում ԱՄՆ-ի քաղաքականության վերաբերյալ իր նկատառումների մասին:

Հայաստանի Ռազմավարական մշակումների կենտրոնի տնօրեն Լևոն Մելիք-Շահնազարյանը խոսեց Հարավային Կովկասի էթնոքաղաքական զարգացումների և Հայաստանի անելիքների մասին:

Ռուսաստանի «Էքսպերտ» ամսագրի հատուկ թղթակից, վերլուծաբան Գևորգ Միրզայանը ներկայացրեց Էրդողանի կառավարման շրջանում Թուրքիայի արտաքին քաղաքականությանը վերաբերող դիտարկումները:

Զեկույցներից հետո տեղի ունեցավ բուռն քննարկում, որի ընթացքում համաժողովի մասնակիցները ներկայացրին անվտանգության խնդիրների շուրջ իրենց տեսակետներն ու առաջարկությունները: