Այլընտրանքային տուրիզմի փառատոն-համաժողով` Վայոց Ձորում

Վայքի «Աշխատանք և հայրենիք» հասարակական կազմակերպությունը նոյեմբերի 17-18-ը ներկայացրեց իր հերթական նախաձեռնությունը՝ «Այլընտրանքային տուրիզմի փառատոն-համաժողով», որի նպատակն է Վայոց Ձորի մարզում տուրիզմի զարգացումը, ինչը մարզի տնտեսական զարգացման կարևոր ուղղություններից մեկն է:

Ամբողջ աշխարհում այսօր մեծ տարածում ունեն տուրիզմի այլընտրանքային ձևերը՝ էկո, ագրո, արկածային, գինու, խոհանոցային, որոնցից յուրաքանչյուրի զարգացման համար Հայաստանում, մասնավորապես Վայոց Ձորում, առկա են բոլոր պայմանները:

Միաժամանակ, տուրիզմի այս ձևերը ավելի են մոտեցնում զբոսաշրջիկներին Հայաստանի մարզերին և դրանց զարգացումը համահունչ է տարածքային համաչափ զարգացման կառավարության որդեգրած քաղաքականությանը:

Վայքի մարզադաշտին հարող անտառում կազմակերպիչները ստեղծել էին այլընտրանքային տուրիզմի խորհրդնաշական միջավայր՝ անտառում խփված էր վրանային ճամբար, շուրջն արածում էին ձիերը, որոնցով զբոսաշրջիկները կարող են զբոսնել, բազմաթիվ մասնակիցներին գրավում էին նաև հեծանիվները, որով նրանք Վայքի նոր վերանորոգված Երիտասարդական փողոցում: Վայոց Ձորի ավանդական խոհանոցը իրենց տաղավարներում ներկայացնում էին մարզի հանրահայտ սննդի օբյեկտները, առանձին տաղավարով ներկայացված էին տեղական գինիները: Միջոցառմանը հրավիրված էին երևանյան տուրիստական ընկերություններ, որոնց համար այս միջոցառումը լավ հնարավորություն էր ծանոթանալու Վայոց Ձորում տուրիզմի հնարավորություններին և իրենց փաթեթները դարձնել ավելի բազմազան և գրավիչ՝ դրանցում ընդգրկելով նաև Վայոց Ձորի գյուղական բնակավայրերը:

Հաջորդ օրը հյուրերը Վայքի Տուրիզմի կենտրոնում տեղական պաշտոնյաների հետ հնարավորություն ունեցան քննարկելու այլընտրանքային տուրիզմի զարգացման հնարավորություններն ու հիմնախնդիրները Վայոց Ձորի մարզում: Քննարկմանը մասնակցում էր և կարևոր առաջարկներով ու դիտողություններով հանդես եկավ Վայոց Ձորի մարզպետ Էդգար Ղազարյանը: Քննարկման արդյունքում մասնակցիները կազմեցին մի շարք համատեղ ծրագրեր, որոնք կարևոր կլինեն Վայոց Ձորում զբոսաշրջության հետագա զարգացման համար: