Փաստաբանների պալատի անդամի աղմկահարույց սպանության մասնակիցներից մեկը նախկին ոստիկան է

Ինչպես հայտնում է shamshyan.com–ը, այսօր՝ նոյեմբերի 19-ին, Ոստիկանության Լոռու մարզային վարչության և Ոստիկանության Վանաձորի և Գուգարքի բաժինների, ինչպես նաև՝ Ոստիկանության քննչական գլխավոր վարչության Լոռու մարզի քննչական բաժնի և նույն բաժնի Վանաձորի ու Գուգարքի քննչական բաժանմունքների կողմից օպերատիվ քննչական և բացատրական աշխատանքների արդյունքում, քիչ առաջ Ոստիկանության Լոռու մարզային վարչություն է մեղայականով ներկայացել Վանաձոր քաղաքի բնակիչ, բարձրագույն կրթությամբ, չամուսնացած 33-ամյա Արտակ Վերանյանը: Գ. Շամշյանը հայտնում է, որ Ա. Վերանյանը 2008 թվականին մաքսանենգություն կատարելու համար դատապարտվել և 11 ամիս իր պատիժն է կրել ոստիկանների համար նախատեսված բանտում: Իսկ մինչ դատապարտվելն աշխատել է Ոստիկանության Տավուշի մարզային վարչության Բագրատաշենի բաժնի քրեական հետախուզության բաժանմունքում որպես օպեր-լիազոր:

Ֆոտոլրագրողը հայտնում է, որ Լոռու մարզի քննչական բաժնի ավագ քննիչ Արամ Մաթևոսյանի կողմից Ա. Վերանյանը որպես կասկածյալ ձերբակալվեց և տեղափոխվեց Ոստիկանության Վանաձորի բաժնի ձերբակալվածների պահման վայր: Նրա նկատմամբ քրեական գործ է հարուցվել ՀՀ Քրօր.-ի 104 հոդվածի 1-ին մասի (սպանությունը, ապօրինաբար մեկ ուրիշին դիտավորությամբ կյանքից զրկելը) և 258 հոդվածի 3-րդ մասի 1-ին կետի (խուլիգանությունը, որը կատարվել է մի խումբ անձանց կամ կազմակերպված խմբի կողմից) հատկանիշներով:

Ա. Վերանյանը կասկածվում է երեկ Լոռու մարզի Գուգարքի տարածաշրջանում նախկին «Կիրովական», այժմ «Մուշ» ռեստորանային համալիրում մի խումբ անձանց կողմից Երևանի բնակիչ, 3 երեխաների հայր, ոստիկանության քննչական ապարատի նախկին աշխատակից Սամվել Շարբաթյանի սպանության մեջ: Նա քննիչի աշխատանքը թողնելուց հետո ՀՀ փաստաբանների պալատում զբաղվել է փաստաբանական գործունեությամբ:

Ինչպես ավելի վաղ հայտնել էր Lurer.com–ը, նոյեմբերի 18-ին սպանություն էր տեղի ունեցել Լոռու մարզի Շահումյան գյուղի «Մուշ» ռեստորանում։ Ոստիկանությունից տեղեկացրել էին, որ հայտնաբերվել է 1963 թվականին ծնված Սամվել Շարբաթյանի դիակը՝ բռնության հետքերով։