Հարսանիքներ չեմ վարի երբեք. Արամ MP3

-Ինչո՞վ է հիմա զբաղված Արամ mp3-ը (Արամ Սարգսյան):

Տարիներ շարունակ երգեր եմ գրել, հավաքել եմ, հիմա լույս աշխարհ եմ հանում: Դրանք ես դեռ լայն մասսաների համար չեմ կատարել, լսել են միայն իմ մտերիմներն ու հարազատները: Կթողարկվի ալբոմ, կնկարահանվեն տեսահոլովակներ:

-Ի՞նչ է սպասում ունկնդրին՝ նոր ալբոմում:

Բոլորովին նոր երգեր, դրանք հիմնականում լինելու են պարային, իմաստային, նաև ժամանակակից: Ի դեպ, բոլոր երգերը լինելու են անգլերեն լեզվով:

-Արամ MP3-ն կամ Արամ Սարգսյանը իրեն փորձել է տարբեր ոլորտներում՝ դերասանութուն, երգարվեստ, հանդիսավարի աշխատանք… Եթե ընտրելու լինես, որի՞ն կտայիր նախապատվությունը:

Երաժշտությունը: Այն անսպառ է, իսկ մյուս աշխատանքները, որ ես արել եմ երբևե կամ անում եմ, հատկապես հեռուստատեսությունը, ժամանակավոր երևույթներ են: Բոլորն էլ գալիս են, անցնում են, իսկ լավ երաժշտությունը շատ երկար կարող է ապրել: Դրա համար էլ հիմա փորձում եմ ավելի լրջորեն աշխատել հենց երաժշտության ուղղությամբ:

-Ասում են՝ Արամ MP3-ն գյումրեցի է:

Իրավաբանորեն՝ երևանցի եմ, էստեղ եմ ծնվել, մեծացել եմ Երևանում: Կարելի է ասել՝ կես գյումրեցի եմ, կես երևանցի՝ ինչպես և կինս, ինչպես և մեր բնագավառի շատ հայտնի մարդիկ: Մանկությանս մի հատվածը անցել է Գյումրիում, էնտեղ շատ բարեկամներ ունենք, բնականաբար, նաև լավ հիշողություններ կան կապված էդ հատվածի հետ:

-Բարբառին տիրապետո՞ւմ ես:

Խոսակցականում ոչ մի բարբառային առանձնահատկութուններ, բնական է, չեն նկատվում, բայց երբեմն կարող եմ բարբառին բնորոշ այնպիսի բառեր օգտագործել, որ շատերը նույնիսկ զարմանում են:

-Քեզ համար վետոներ կա՞ն քո արվեստում:

Միշտ ասել եմ, որ հարսանիքներ չեմ վարի երբեք, դա իմ սկզբունքներին դեմ է, ռաբիս չեմ երգի, չեմ կատարի անճաշակ, անորակ երաժշտություն:

–Ո՞ր աշխատանքն է քեզ ավելի շատ եկամուտ բերում՝ դերասանությո՞ւնը, հանդիսավարի աշխատա՞նքը, թե՞ երգը:

Չեմ մտածել, երևի բոլորն էլ հավասար եկամուտ են բերում, մեկը մյուսին լրացնում է, բալանսի է բերում: Հենց էդ բալանսի համար էլ աշխատում ենք օր ու գիշեր, աշխատում ենք շատ ու քրտնաջան:

-«32»-ն ու «Վիտամին»-ն իրո՞ք առանձին են աշխատում, թե՞ «Շանթ»-ը միայն քիչ էր, որոշեցիք գրավել նաև «Արմենիա»-ն:

Միանշանակ առանձին ենք աշխատում:

-Իսկ հարաբերությունները…

Մենք շարունակում ենք լավ ընկերներ մնալ, շարունակում ենք նախկինի պես շփվել:

-Բաժանվելու նախաձեռնությունը ո՞ւմ կողմից է եղել:

Կոնկրետ ոչ մեկի: Պարզապես մեր թիմում տարաձայնություններ կային՝ հեռուստաալիքի ընտրության հարցում, մի մասը նախընտրեց «Արմենիա»-ն, էդպես էլ առանձնացանք: Այսքանը:

-Հաջորդ փուլերի մասին մտածե՞լ ես:

Այս պահին չգիտեմ՝ հաջորդ փուլը որն է ու ինչ կլինի:

Online-tv.am