ՀԱԿ-ՀՅԴ-ԲՀԿ-ն միասնական թեկնածուո՞վ հանդես կգան

Facebok-ի օգտատեր Համլետ Կիրակոսյանն իր էջում գրել է.

«Հայաստանյան քաղաքական ուժերի միջեւ ծավալվող բանակցություններից ու քննարկումներից ինձ համար ամենահետաքրքիրն ու ուշագրավը ՀԱԿ-ՀՅԴ հանդիպումն է՝ այնտեղ շոշափվող հարցերը, մթնոլորտը, ընդհանուր տրամադրվածությունն ու տրամադրությունները, այս երկու ուժերի մոտեցումները, դրանց ընդհանրություններն ու տարբերությունները, նաեւ եզրահանգումները: Ինչ կարծիք էլ ունենանք այս երկու ուժերի մասին, ՀԱԿ-ն ու ՀՅԴ-ն հայաստանյան քաղաքական այն եզակի ուժերից են, որոնք ընկալվում են որպես այդպիսին՝ կոնկրետ գաղափարախոսությամբ ու ուղղվածությամբ:

Հանդիպումից հետո ԱԺ ՀՅԴ խմբակցության ղեկավար Արմեն Ռուստամյանը նշել է, որ բավական խորքային քննարկում է տեղի ունեցել, ներկայացրել են ՀՅԴ-ի առաջարկի 7 կետերը, որոշ կետերի վերաբերյալ կողմերի մոտեցումներ ըտարբեր էին, բայց հիմնական հարցերի վերաբերյալ դիրքորոշումները նույնն են:

Հատկանշական է, որ ինչպես Ռուստամյանը, այնպես էլ ՀԱԿ ներկայացուցիչ Լեւոն Զուրաբյանը չեն բացառել նախագահական ընտրություններում միասնական թեկնածուով հանդես գալը: «Չի կարելի բացառել, որ ՀԱԿ, ՀՅԴ, ԲՀԿ համագործակցությունը վերաճի նրան, որ նախագահական ընտրություններում համաձայնեցված գործողություններ լինեն»,- հայտարարել է Զուրաբյանը՝ նկատի ունենալով նաեւ միասնական թեկնածով հանդես գալը. «Համագործակցության տարբեր սցենարներ հնարավոր են»»: