Կարեն Կարապետյանի հերթական թռիչքը

Երևանի քաղաքապետի պաշտոնից հրաժարական տալուց մեկ տարի հետո էլ Կարեն Կարապետյանը շարունակում է մնալ Հայաստանի քաղաքական դաշտի լուրջ ֆիգուրներից մեկը: «ՀայՌուսգազարդ»-ի նախկին տնօրենի մոտ հերթական առաջխաղացումն է արձանագրվել: Կարապետյանը նշանակվել է «Գազպրոմ մեժռեգիոնգազ» ընկերության գլխավոր տնօրենի տեղակալ՝ ռազմավարական զարգացման հարցերով: Այս ընկերությունը «Գազպրոմ» ԲԲԸ-ի 100 տոկոսանոց դուստր ընկերությունն է, որը զբաղվում է Ռուսաստանի Դաշնության տարածքում բնական գազի իրացմամբ: Կարապետյանը միաժամանակ պահպանել է նաև «Գազպրոմբանկի» փոխնախագահի պաշտոնը, որը զբաղեցնում է 2011թ. դեկտեմբերից:

Ռուսական կողմն այս քայլով, ըստ երևույթին, ևս մեկ անգամ ցանկանում է ընդգծել Կարապետյանի՝ միանգամայն այլ «level»-ի գործիչ լինելը: Դեռ Երևանի քաղաքապետ լինելու շրջանում խոսվում էր, որ քաղաքապետի պաշտոնն ընդամենն առաջին քայլն է, հարմար «տրամպլին»՝ դեպի վարչապետի պաշտոն այս անձնավորության անցումը կազմակերպելու համար: Եվ իսկապես, որպես քաղաքապետ Կարեն Կարապետյանն իրեն միանգամայն նոր շնչով դրսևորեց. Կարապետյանն իր հետ ոչ միայն «դրայվ» բերեց, այլև իրական փոփոխություններ: Ճիշտ է, շատ ծրագրերի հիմքեր դրվել էին դեռևս Բեգլարյան Գագիկի ժամանակ՝ ինչպես շենքերի բարեկարգում, կանաչապատում և այլն, սակայն դրանք իրականացնելու համար էլ հարկավոր էր ունենալ խարիզմա և ինտելեկտ: Եվ երևի թե հենց միայն իրեն բնորոշ «դրայվն» էլ ուժ տվեց Կարապետյանին՝ պատերազմ հայտարարել փողոցային առևտրին և անտեսելով դժգոհությունները՝ իրական քայլեր ձեռնարկել այդ երևույթը վերացնելու ուղղությամբ:

Կարապետյանի պաշտոնավարումն իսկապես ինչ-որ բան խոստանում էր: Սակայն այդ պաշտոնավարումն ինչ-ինչ պատճառներով կիսատ մնաց. 10 տարի «ՀայՌուսգազարդ»-ը ղեկավարած անձնավորությունն անգամ մեկ տարի չձգեց Երևանի քաղաքապետի աթոռին և 2011թ. հոկտեմբերին հանկարծակի հրաժարական տվեց: Ասում էին, թե ռուսական կողմը Կարապետյանին դիտավորյալ հեռացրեց Հայաստանից՝ նրա անվան վրա որևէ ստվեր թույլ չտալու համար՝ հաշվի առնելով, որ փողոցային առևտրի դեմ պայքարը, մի քանի ամսից սպասվող խորհրդարանական ընտրությունները, որոնցից քաղաքապետը չէր կարող անմասն մնալ, այսպես թե այնպես Կարապետյանի անունը շահարկումների էին ենթարկելու: Փակ, բայց որոշ պահից սկսած դուրս թողնված ինֆորմացիայով, Կարեն Կարապետյանը 2018թ. նախագահական ընտրությունների ֆավորիտն էր, այսինքն՝ Սերժ Սարգսյանի փոխանորդը, այսինքն՝ մի մարդ, ում հարկավոր էր պահել ու պահպանել մինչև այն պահը, երբ «հնչեր վերջինիս զանգը»: Ռուսական կողմը հենց այդ նպատակով էլ իր կադրին հեռացրեց Հայաստանից: Կարապետյանը նշանակում ստացավ «Գազպրոմբանկ»–ում:

Տիգրան Սարգսյանի կառավարումից դժգոհությունները գնալով աճում են: Սարգսյանի պաշտոնանկությունը երևի թե այդքան էլ հեռու չէ: Սակայն թե ո՞ր պահին որոշում կընդունվի օգտագործել Կարապետյանի պոտենցիալն ու նրան մտցնել խաղի մեջ, դժվար է ասել: Եթե նա իսկապես 2018թ. «նախագահացուն» է, ապա մինչ այդ պատմական պահը դեռ բավական ժամանակ կա: Եթե Կարապետյանի հերթական թռիչքը ՀՀ վարչապետի պաշտոնն է, ապա դա ևս հնարավոր է կազմակերպել ցանկացած պահի. քաղաքապետի պաշտոնում 10 ամիսը բավական դարձավ Կարեն Կարապետյանին՝ ճանաչվելու և առ այսօր իր վարկը չկորցնելու համար: Եթե ռուսական կողմը նաև նպաստի տարիների հետ «դրայվի» ավելացմանը, ապա վարչապետի պաշտոնում էլ հնարավոր է անգամ մեկ տարում այնպիսի քաղաքական կապիտալ կուտակել, որ լիուլի բավականացնի նախագահական որակյալ քարոզարշավ կազմակերպելու համար:

Լուսինե Կեսոյան