«ՀԺ». Գյուղացիները շահել են

Երեկ ՀՀ փոխվարչապետ, տարածքային կառավարման նախարար Արմեն Գևորգյանի մոտ, ինչպես «Հայկական ժամանակ»-ը տեղեկացավ նախարարության պաշտոնական կայքից, քննարկվել են «Գույքահարկի և հողի հարկի գծով առաջացած ապառքների մասին» օրենքի մասին հարցեր:

Խնդիրն այն է, որ պոպուլիստական այս օրենքն ընդունվեց 2012-ի մայիսին, ԱԺ–ի ընտրություններից առաջ, և նպատակը հողի հարկի և գույքահարկի գծով գյուղացիների կուտակած պարտքերի ներումն էր:

«Պետությունն այսպիսի նախաձեռնությամբ հանդես գալով՝ շուրջ 43 միլիարդ դրամի հարկեր է զիջում գյուղատնտեսության ոլորտում»,օրենքի նախագծի քննարկման ժամանակ՝ 2012–ի փետրվարին հայտարարել էր ՀՀ վարչապետ Տիգրան Սարգսյանը:

Երեկ հրապարակված տվյալներով, մասնավորապես գույքահարկի գծով՝ ներվել է 4.9 միլիարդ դրամի պարտք, որից 1.9 միլիարդը կամ մոտ 40 տոկոսը՝ Երևանում: Այսինքն, «գյուղատնտեսության ոլորտում» զիջված հարկերի 40 տոկոսը վերաբերում է մայրաքաղաքին:

Գյուղացիներն այս օրենքի կիրարկումից, ինչպես ակնհայտ երևում է, շատ են շահել: