Մեր ցանկությունն է լինել հավասար գործընկեր. ՀՀ-ում Բելառուսի դեսպան

Դեկտեմբերի 5-ին ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը հանդիպեց ՀՀ-ում Բելառուսի Հանրապետության արտակարգ եւ լիազոր դեսպան Ստեպան Սուխորենկոյի եւ նրա առաջին տեղակալ Վալերի Գորելկոյի հետ:

Հանդիպման ընթացքում քննարկվեցին երկու երկրների միջխորհրդարանական կապերի զարգացմանը վերաբերող հարցեր: Մասնավորապես կարեւորվեց միջխորհրդարանական համագործակցության դերը երկկողմ հարաբերությունների ամրապնդման գործում:

Զրուցակիցներն անդրադարձան նաեւ երկու երկրների՝ միջազգային կազմակերպություններում փոխշահավետ համագործակցության զարգացման հեռանկարներին: Ըստ Արտակ Զաքարյանի՝ առաջնային խնդիր է, որ Բելառուսի խորհրդարանական պատվիրակությունը՝ որպես հավասար գործընկեր, ներգրավված լինի Արեւելյան գործընկերության Եվրանեսթ խորհրդարանական վեհաժողովում: Այդ առումով աշխատանքներ են կատարվում Եվրանեսթ ԽՎ-ում ստեղծված հատուկ աշխատանքային խմբում:

Կարեւորելով եվրոպական ինտեգրացիան՝ Ստեպան Սուխորենկոն նշեց, որ իրենց ցանկությունն է լինել հավասար գործընկեր:

Հանդիպմանը անդրադարձ եղավ Բելառուսի խորհրդարանական ընտրություններին, ինչպես նաեւ Հայաստան-Բելառուս միջխորհրդարանական հանձնաժողովի հետագա աշխատանքներին եւ խորհրդարանների միջեւ կապերի աշխուժացման հնարավորություններին: Կողմերը պայմանավորվեցին միջոցներ ձեռնարկել երկու երկրների խորհրդարանների արտաքին հարաբերությունների հանձնաժողովների միջեւ համագործակցությունը խորացնելու համար: