Հրաժեշտի հանդիպում

ՀՀ կրթության և գիտության նախարար Արմեն Աշոտյանն այսօր ընդունել է Եվրոպային խորհրդի գլխավոր քարտուղարի հատուկ ներկայացուցիչ տիկին Սիլվիա-Մարիա Զեհեին, ով ավարտում է իր առաքելությունը Հայաստանում: Ողջունելով տիկին Զեհեին` նախարարն ընդգծել է, որ Եվրոպայի խորհուրդն իր բազմամյա գործունեության ընթացքում միշտ հուսալի և լուրջ գործընկեր է եղել Հայաստանի կրթության ոլորտի համար: «Հատուկ շնորհակալություն վերջին տարիների ընթացքում Հայաստանի ժողովրդավարացման գործընթացներում Ձեր հետևողական և անձնական ներգրավման և պրոֆեսիոնալ աշխատանքի համար:

Եվրոպայի խորհրդի հայաստանյան գրասենյակի և անձամբ Ձեր աջակցությամբ հնարավոր եղավ իրականացնել հսկայական ծավալի աշխատանք, այդ թվում նաև` կրթության ոլորտում: Ներկայումս շարունակվում են իրականացվել բազմաթիվ ավանդական և նոր ծրագրեր. Հայաստանը կարծես երկրորդ շնչով է ներգրավվում ԵԽ կրթական գործողությունների և միջոցառումների մեջ: Ջերմությամբ եմ հիշում մեր համատեղ աշխատանքը. համոզված եմ, որ այս ընթացքում Դուք սիրեցիք Հայաստանը: Հակառակ պարագայում` հնարավոր չէ բացատրել Ձեր հետևողական և նվիրված աշխատանքը: Դժվար է պատկերեցնել Հայաստանն` առանց Ձեզ: Վստահ եմ, որ Ձեր հետագա աշխատանքային գործունեության ընթացքում ևս հաջողություններ կարձանագրեք»,-նշել է Արմեն Աշոտյանը:

Տիկին Սիլվիա-Մարիա Զեհեին իր հերթին հույս է հայտնել, որ Եվրոպայի խորհրդի հետ իրականացվող ծրագրերը կկրեն շարունակական բնույթ, մասնավորապես, ավագ դպրոցների բարեփոխումների, հակակոռուպցիոն ծրագրերի համատեքստում: «Համոզված եմ, որ կրթության ոլորտում միշտ պետք է արվեն ներդրումներ, քանի որ դրանով առաջին հերթին ներդրում է արվում երկրի ապագայի մեջ»,-նշել է ԵԽ հայաստանյան գրասենյակի ղեկավարը:

Հանդիպման ընթացքում անդրադարձ է կատարվել նաև շարունակական կրթության, մարդու կրթության իրավունքի ապահովմանն առնչվող այլ հարցերի: