Այս ողջ գործընթացը հակաեկեղեցական շարժման տրամաբանության մեջ է․ փաստաբան

Այսօր առավոտյան քննչական մարմինը, բնականաբար, իրավապահ մարմնի ներկայացուցիչների ուղեկցությամբ, խուզարկություններ է կատարել Արագածոտնի թեմի հոգևորականների տներում, Արագածոտնի թեմի առաջնորդարանում և աշխարհիկ մի քանի աշխատակիցների բնակարաններում։ Առգրավել են տարբեր տեսակի փաստաթղթեր, համակարգիչներ, այդ թվում՝ օրինակ, մի աշխարհիկ աշխատակցուհու ընտանիքի անդամների համակարգիչները, հեռախոսները։ Այս մասին լրագրողների հետ զրույցում ասաց փաստաբան Արա Զոհրաբյանը։

Նա նշեց, որ Քննչական կոմիտե են բերման ենթարկվել վեց հոգևորականներ և մի քանի աշխարհիկ աշխատակիցներ՝ գանձապահ, գործավար, հաշվապահ և այլք։

«Հիմա Մկրտիչ Սրբազանի տեղը չեն հայտնում, ընդ որում, մենք պաշտոնապես դիմել ենք Քննչական կոմիտեին և Երևանի քննչական վարչությանը, ներկայացրել ենք նաև մեր լիազորություններ հավաստող փաստաթղթերը և խնդրել ենք իրենց, որպեսզի ապահովեն մեր հանդիպումը Մկրտիչ Սրբազանի հետ՝ նրա իրավունքները պաշտպանելու նկատառումներից ելնելով: Այստեղ նաև բերման ենթարկվածներին ենք հանդիպել»,– ասաց Զոհրաբյանը՝ նշելով, որ ներսում գտնվողները վկայի կարգավիճակ ունեն։

Փաստաբանի կարծիքով՝ այս ողջ գործընթացը հակաեկեղեցական շարժման տրամաբանության մեջ է և ճնշում է Հայ Առաքելական Եկեղեցու նկատմամբ։

«Մեր տեղեկություններով՝ քրեական գործը առնչվում է հավաքներին մասնակցելուն իբրև հարկադրելու Տեր Արամի ցուցմունքի կամ հաղորդման հետ, և նաև որոշակի ֆինասական հարցերի հետ»,– մանրամասնեց Զոհրաբյանը։

Հարցին, թե Դանիել Իոաննսիայնի հաղորդմա՞ն հիման վրա են հոգևորականներին բերմալ ենթարկել, նա դրական պատասխան տվեց․ «Որքանով տեղյակ եմ՝ այո։ Դանիել Իոաննիսյանի հաղորդումն էլ կա»։