Բռնցքամարտի ԱԱ. Հայաստանի 6 ներկայացուցիչ դուրս է եկել քառորդ եզրափակիչ

Դուբայում ընթացող բռնցքամարտի աշխարհի առաջնությունում Հայաստանի հավաքականը տպավորիչ արդյունքներ է գրանցել։ Ռինգ դուրս եկած Հայաստանի 8 ներկայացուցիչներից 6-ին հաջողվել է հաղթահարել 1/8 եզրափակչի արգելքն ու նվաճել քառորդ եզրափակչի ուղեգրեր։ Այս մասին տեղեկանում ենք armsport.am կայքից։

Մասնավորապես, գերծանր քաշային Դավիթ Չալոյանը և 60 կգ քաշային Արթուր Բազեյանը մրցավարների միաձայն որոշմամբ հաղթել են համապատասխանաբար Տաջիկստանի և Գանայի ներկայացուցիչներին։ Կամային հաղթանակ է տոնել 48 կգ քաշային Բարեղամ Հարությունյանը. նա առաջին ռաունդում զիջելուց հետո կարողացել է բեկել մենամարտի ընթացքն ու 4։1 հաշվով առավելության հասնել թաիլանդցի մրցակցի նկատմամբ։

Ավելի վաղ քառորդ եզրափակչի ուղեգրեր էին նվաճել նաև Հովհաննես Բաչկովը (67 կգ), Արտուշ Հովհաննիսյանը (80 կգ) և Նարեկ Մանասյանը (92 կգ)։

Ցավոք, պայքարից դուրս են մնացել 75 կգ քաշային Վախթանգ Հարությունյանը և 67 կգ քաշային Արմեն Մաշկարյանը, որոնք զիջել են Ուզբեկստանը ներկայացնող մարզիկներին։