Զելենսկին Սերգեյ Կիսլիցային նշանակել է նախագահի գրասենյակի փոխղեկավար

Ուկրաինայի նախագահ Վլադիմիր Զելենսկին արտաքին գործերի նախարարի տեղակալ Սերգեյ Կիսլիցային նշանակել է նախագահի գրասենյակի փոխղեկավար։ Այս մասին հաղորդում է ուկրաինական Страна.ua-ն՝ հղում անելով նախագահի պաշտոնական կայքում հրապարակված հրամանագրին։

Լրատվամիջոցի փոխանցմամբ՝ Կիսլիցան նշանակվել է նախագահի գրասենյակի առաջին փոխղեկավարի պաշտոնում։ Համապատասխան հրամանագիրը արդեն ուժի մեջ է մտել։

Հիշեցնենք, որ նախորդ տարվա նոյեմբերի 28-ին Զելենսկին պաշտոնանկ էր արել նախագահի գրասենյակի ղեկավար Անդրեյ Երմակին, որի հեռացումը կապվում էր գործարար Տիմուր Մինդիչի շուրջ ծավալված խոշոր կոռուպցիոն գործի հետ։ Դրանից հետո նախագահի գրասենյակի ղեկավար էր նշանակվել Ուկրաինայի հետախուզության գլխավոր վարչության գործող պետ Կիրիլ Բուդանովը։