Ադրբեջանը քաղաքականապես ամրապնդեց իր փայլուն հաղթանակը․ Ալիև

Անցած տարին իսկապես կարելի է պատմական համարել։ Որովհետև հենց 2025 թվականին ավարտվեց ադրբեջանա-հայական պատերազմը քաղաքականապես։ Եվ մենք արդեն մի քանի ամիս է՝ խաղաղության մեջ ենք ապրում։ Այս մասին լրատվամիջոցներին ասել է Իլհամ Ալիևը։

«Պատերազմն ունեցել է տարբեր փուլեր։ Լավ հիշում եք դա։ Պատերազմի ակտիվ փուլը, հրադադարը, Երկրորդ Ղարաբաղյան պատերազմը, «հակաահաբեկչակա»ն գործողությունը և դրան հաջորդած ժամանակահատվածը... Եվ այս բոլոր իրադարձություններն ավարտվեցին անցյալ տարվա օգոստոսին։

Այլ կերպ ասած՝ Ադրբեջանը քաղաքականապես ամրապնդեց մարտադաշտում  տարած իր փայլուն հաղթանակը և, ինչպես նշեցի, իր քաղաքական «կնիքը» դրեց դրա վրա՝ աշխարհի թիվ մեկ գրասենյակում։ Եվ սա, անկասկած, այն իրադարձություններից մեկն է, որը կմնա մեր անկախության պատմության հիշողության մեջ։ Հնարավոր է՝ նույնիսկ լինի առաջինների շարքում։

Այս տեսանկյունից, անցած տարին կարելի է համարել շատ հաջողակ և պատմական մեր երկրի և մեր ժողովրդի համար։ Վստահ եմ, որ ադրբեջանցի ժողովուրդը կշարունակի ապրել խաղաղության մեջ։

Եվ չնայած մենք այս պայմաններում ապրում ենք ընդամենը հինգ ամիս, մենք արդեն տեսնում ենք դրա պտուղները։ Ե՛վ քաղաքական, և՛ տնտեսական առումով մենք տեսնում ենք հասարակության մեջ դրական տրամադրություն, և՛ կայունության ու անվտանգության նկատմամբ վստահության աճ։ Այս բոլոր գործոնները, անկասկած, մեզ հնարավորություն են տալիս հաջողությամբ առաջ շարժվել և շարունակել լուծել երկրի առջև ծառացած բոլոր մարտահրավերները»,– ասել է նա։