Եվրոպարլամենտում առաջարկել են ՆԱՏՕ-ի երկրներում կանչել ԱՄՆ բոլոր դեսպաններին՝ Գրենլանդիայի հարցով

Եվրոպարլամենտի անվտանգության և պաշտպանության ենթահանձնաժողովի նախագահ Մարի-Ագնես Շտրակ-Ցիմերմանը կոչ է արել ՆԱՏՕ-ին անդամակցող Եվրամիության բոլոր երկրներին միաժամանակ կանչել ԱՄՆ դեսպաններին։ Այդ մասին հայտնում է РИА Новости-ն՝ ընդգծելով, որ նախաձեռնությունը կապված է Գրենլանդիայի շուրջ Վաշինգտոնի հնչեցրած հայտարարությունների հետ։

Շտրակ-Ցիմերմանի խոսքով՝ նման համատեղ քայլը թույլ կտա միասնական ու հստակ ուղերձ փոխանցել ԱՄՆ-ին՝ ցույց տալով, որ Եվրոպան անընդունելի է համարում Գրենլանդիայի հնարավոր ուժային զավթումը։ Նա նշել է, որ թեև նման սցենարը ցավալիորեն հնարավոր է, Եվրոպան չի կարող պարզապես դիտորդի դերում մնալ և անտարբեր հետևել այդ գործընթացին։

Եվրոպարլամենտի պատգամավորը զգուշացրել է, որ Գրենլանդիայի նկատմամբ ԱՄՆ-ի հնարավոր հարձակումը կարող է փաստացի վերջ դնել ՆԱՏՕ-ին։ Միևնույն ժամանակ նա դժգոհություն է հայտնել, որ Վաշինգտոնում Եվրամիությանը լուրջ չեն ընկալում։ Ավելի վաղ իսպանական El País պարբերականը գրել էր, որ Վենեսուելայի շուրջ զարգացումների ֆոնին ԵՄ-ի արձագանքը վկայում է ԱՄՆ նախագահ Դոնալդ Թրամփի հանդեպ խոր վախի մասին։