FT․ ԵՄ երկրները պատրաստվում են խստացնել միգրացիոն քաղաքականությունը

Եվրոպական միության մի շարք երկրների մայրաքաղաքներում պնդում են միգրացիոն միջոցների խստացման անհրաժեշտությունը, ինչը որոշ դեպքերում համընկնում է ԱՄՆ նախագահ Դոնալդ Թրամփի վարած քաղաքականության հետ։ Այդ մասին գրում է Financial Times-ը՝ նշելով, որ ԵՄ-ում նկատվում է մոտեցումների կոշտացման միտում։

Հոդվածում ընդգծվում է, որ մի քանի տարի առաջ նման առաջարկները լայն դիմադրության էին հանդիպում, սակայն այժմ ավելի շատ երկրներ են ընդունում խստացման գաղափարը։ Դանիայի միգրացիայի նախարար Ռասմուս Ստոկլունդը հիշեցրել է, որ նախկինում իրեն անվանում էին «ռասիստ» և «վիճահարույց գործիչ», մինչդեռ այսօր նույն մոտեցումները տարածվում են ԵՄ բազմաթիվ մայրաքաղաքներում։

FT-ն նշում է, որ միգրացիոն քաղաքականության խստացման քննարկումները ընթանում են սոցիալ-տնտեսական լարվածության և ընտրական գործընթացների ֆոնին։ Ավելի վաղ հաղորդվել էր նաև, որ վերջին 25 տարվա ընթացքում առաջին անգամ լեհերը զանգվածաբար վերադառնում են Գերմանիայից հայրենիք՝ տնտեսության վատթարացման, խտրականության և Լեհաստանի աճող գրավչության պատճառներով։