Եվրահանձնաժողովը Արկտիկան հայտարարել է ԵՄ անվտանգության առանցքային առաջնահերթություն

Եվրոպական միությունում Արկտիկայի տարածաշրջանը դիտարկվում է որպես անվտանգության գլխավոր առաջնահերթություն։ Այդ մասին հայտարարել է Եվրամիության արտաքին քաղաքական ծառայության պաշտոնական ներկայացուցիչ Անիտտա Հիպպերը՝ ընդգծելով, որ Բրյուսելը Գրենլանդիայի հարցը դիտարկում է հենց Արկտիկայի անվտանգության համատեքստում։

Հիպպերի խոսքով՝ ԵՄ-ն լիակատար համերաշխություն է հայտնում Դանիային և Գրենլանդիային՝ արձագանքելով տարածաշրջանի շուրջ աճող աշխարհաքաղաքական լարվածությանը։ Նրա հայտարարությունը հնչել է այն ֆոնին, երբ ԱՄՆ նախագահ Դոնալդ Թրամփը հայտարարել էր, որ Գրենլանդիան «կենսական անհրաժեշտություն» է ԱՄՆ-ի համար, իսկ Դանիայի վարչապետ Մետտե Ֆրեդերիկսենը կտրուկ մերժել էր կղզին զավթելու վերաբերյալ ցանկացած խոսակցություն՝ դրանք անվանելով անիմաստ և անընդունելի։

Ավելի վաղ Լեհաստանի վարչապետ Դոնալդ Տուսկը հայտարարել էր, որ Գրենլանդիայի հարցում ամբողջ Եվրոպան կկանգնի Դանիայի կողքին՝ զգուշացնելով, որ Վաշինգտոնի դիրքորոշումը կարող է խաթարել ՆԱՏՕ-ի գոյության իմաստը։