ԱՄՆ նախկին պաշտոնյան համեմատել է Վաշինգտոնի և Մոսկվայի գործողությունները

Սպիտակ տան Ազգային անվտանգության խորհրդում Ռուսաստանի հարցերով նախկին պատասխանատու Ֆիոնա Հիլը ԱՄՆ-ի կողմից Վենեսուելայում իրականացված գործողություններից հետո հարց է բարձրացրել՝ ինչու Միացյալ Նահանգները կարող են ուժ կիրառել իրենց «հետնաբակում», իսկ Ռուսաստանը՝ ոչ։ Այդ մասին նա հայտարարել է Brookings Institution կենտրոնում՝ The New York Times-ին տված մեկնաբանության ընթացքում։

«Եթե մենք իրավունք ունենք ագրեսիվ գործողություններ իրականացնելու մեր ազդեցության գոտում, ապա ինչո՞ւ նույն իրավունքը չի կարող ունենալ Ռուսաստանը», — ասել է Հիլը՝ կասկածի տակ դնելով միջազգային քաղաքականության մեջ կիրառվող երկակի չափանիշները։ Նրա խոսքերը հնչել են այն ֆոնին, երբ ԱՄՆ-ը Վենեսուելայում իրականացրել է ռազմական գործողություն և ձերբակալել երկրի նախագահ Նիկոլաս Մադուրոյին։

Ավելի վաղ Սպիտակ տան աշխատակազմի ղեկավարի տեղակալ Սթիվեն Միլլերը հայտարարել էր, որ միջազգային «քաղաքավարության» մասին կարելի է երկար խոսել, սակայն իրական աշխարհը ղեկավարվում է ուժով։ Իր հերթին ՄԱԿ-ում Ռուսաստանի մշտական ներկայացուցիչ Վասիլի Նեբենզյան հայտարարել էր, որ ԱՄՆ գործողությունները Վենեսուելայում նոր թափ են տվել նեոկոլոնիալիզմին, իսկ ՌԴ ԱԽ փոխնախագահ Դմիտրի Մեդվեդևը քննադատել էր Եվրոպայի «լռությունը»՝ տեղի ունեցողը անվանելով ԱՄՆ-ի «խաղաղարարության դասական օրինակ»։