Մեծ Բրիտանիան և Ֆրանսիան զորքեր կուղարկեն Ուկրաինա խաղաղության համաձայնագրի կնքումից հետո

Մեծ Բրիտանիան և Ֆրանսիան Ուկրաինայի հետ ստորագրել են մտադրությունների հուշագիր Ուկրաինայում զորքեր տեղակայելու մասին, եթե Ռուսաստանի հետ խաղաղության համաձայնագիր կնքվի։ «Արմենպրես»-ի փոխանցմամբ՝ BBC-ն հաղորդում է, որ այս մասին հայտարարել է Մեծ Բրիտանիայի վարչապետ Քիր Սթարմերը։

Հունվարի 6-ին Փարիզում «Կամեցողների կոալիցիայի» երկրներից ղեկավարների և բարձրաստիճան պաշտոնյաների բանակցություններից հետո Սթարմերն ասել է, որ Մեծ Բրիտանիան և Ֆրանսիան «կստեղծեն ռազմական կենտրոններ Ուկրաինայում»՝ ապագա ներխուժումը կանխելու համար։

Իր հերթին, Ֆրանսիայի նախագահ Էմանուել Մակրոնը հայտարարել է, որ կարող են տեղակայվել հազարավոր զինծառայողներ։ Նա նաև նշել է, որ Ուկրաինայի դաշնակիցները «զգալի առաջընթաց» են գրանցել բանակցություններում։

Հանդիպման ժամանակ Ուկրաինայի դաշնակիցները նաև հիմնականում համաձայնել են Ուկրաինայի համար անվտանգության ամուր երաշխիքների շուրջ և առաջարկել են, որ ԱՄՆ-ն վերահսկի հրադադարի ռեժիմի մոնիթորինգը։ Միևնույն ժամանակ, տարածքների հարցը դեռևս քննարկվում է։

Ռուսաստանը բազմիցս զգուշացրել է, որ Ուկրաինայում ցանկացած օտարերկրյա զորք կլինի «օրինական թիրախ»։

«Կամեցողների կոալիցիայի» հանդիպմանը ներկա են գտնվել նաև ԱՄՆ նախագահի հատուկ բանագնաց Սթիվ Ուիթքոֆը և ԱՄՆ նախագահի խորհրդական ու փեսա Ջարեդ Քուշները։ Ուիթքոֆը հայտարարել է, որ «անվտանգության կայուն երաշխիքները և բարգավաճման ամուր հանձնառությունները կարևոր են Ուկրաինայում կայուն խաղաղության համար»։ Նրա խոսքով՝ անվտանգության հետ կապված հարցերը հիմնականում արդեն համաձայնեցվել են։

Ուկրաինայի նախագահ Վոլոդիմիր Զելենսկին իր հերթին ասել է, որ Փարիզում «հսկայական առաջընթաց» է գրանցվել, սակայն հավելել է, որ ինքը ջանքերը «բավարար» կհամարի միայն այն դեպքում, եթե դրանք հանգեցնեն պատերազմի ավարտին։

«Կամեցողների կոալիցիայի» հանդիպման արդյունքներով հռչակագիրը ստորագրած երկրները նաև պայմանավորվել են բազմազգ ուժեր ուղարկել Ուկրաինա խաղաղությունից հետո։

Բելգիայի պաշտպանության նախարարը հայտարարել է, որ խաղաղության հաստատումից հետո Բրյուսելը զորքեր կուղարկի Ուկրաինա և ակտիվ մասնակցություն կցուցաբերի իր ծովային և ռազմական հնարավորություններով։