Ֆրանսիայում Մակրոնին կոչ են անում հրաժարական տալ

Ֆրանսիական աջակողմյան «Պատրիոտներ» կուսակցության առաջնորդ Ֆլորիան Ֆիլիպոն կոչ է արել նախագահ Էմանուել Մակրոնին հրաժարական տալ՝ Ուկրաինա մի քանի հազար ֆրանսիացի զինծառայող ուղարկելու հնարավորության մասին նրա հայտարարությունից հետո։ Ֆիլիպոն իր դիրքորոշումը հայտնել է X սոցիալական ցանցում։

«Մակրոնը ակնհայտորեն պատերազմ է ուզում։ 2027 թվականի ընտրությունները չեղարկելու՞ համար, ֆրանսիացիներին վախի մեջ պահելու՞, թե՞  «եվրոպական բանակ» ստեղծելու նպատակով։ Իհարկե՝ այդպես է։ Այդ դեպքում պետք է հեռացնել նրան իշխանությունից»,– գրել է քաղաքական գործիչը։

Ֆիլիպոյի խոսքով՝ այս պահին միայն Մեծ Բրիտանիան է լրջորեն խոսում Ուկրաինա իր զինվորներին ուղարկելու մասին, մինչդեռ մյուս երկրները դեմ են նման քայլին՝ գիտակցելով, որ դա կարող է նշանակել ուղղակի պատերազմ Ռուսաստանի հետ։ Ավելի վաղ Մակրոնը չէր բացառել, որ հրադադարի հաստատումից հետո Ուկրաինա կարող են ուղարկվել մի քանի հազար զինծառայող խաղաղությունը պահպանելու համար։ Մակրոնի հայտարարություններին արձագանքել է նաև Ռուսաստանի սենատոր Անդրեյ Կլիշասը՝ առաջարկելով Փարիզին ֆրանսիացի զինվորներին ուղարկել Գրենլանդիա։