Լուկաշենկոն հայտարարել է, որ Բելառուսը թշնամիներ չունի

Բելառուսի նախագահ Ալեքսանդր Լուկաշենկո-ն հայտարարել է, որ իր երկիրը թշնամիներ չունի՝ նշելով, որ գոյություն ունեն միայն հնարավոր հակառակորդներ։ Նրա խոսքերը մեջբերում է ԲելՏԱ-ն։

Լուկաշենկոն այս հայտարարությունն արել է Սուրբ Ծննդյան տոնի օրը՝ Մինսկի շրջանի Օկոլիցա գյուղում գտնվող եկեղեցի այցելության ընթացքում։ Նա եկեղեցուն նվիրել է Աստվածամոր «Մինսկյան» սրբապատկերի պատճենը՝ ընդգծելով, որ այն պաշտպանում է տեսանելի և անտեսանելի վտանգներից։ «Թշնամիներ, կարելի է ասել, չունենք, բայց, Աստված մի արասցե, հնարավոր հակառակորդներին պետք է տեսնենք։ Եվ գուցե մեր սրբապատկերը մեզ օգնի այդ հարցում»,– ասել է նախագահը։

Բելառուսի ղեկավարը հավելել է, որ սրբապատկերը մարդկանց պարգևում է հանգստություն և մխիթարություն դժվար պահերին։ Նրա խոսքով՝ երկրում կան բոլոր պայմանները մարդկանց արժանապատիվ ապրելու և իրենց ընտանիքները պահելու համար, եթե նրանք աշխատեն։ Ավելի վաղ Լուկաշենկոն նույն այցելության ընթացքում նշել էր, որ աղոթել է Բելառուսում ձյունառատ և սառնամանիքներով եղանակի համար՝ ընդգծելով, որ այդ խնդրանքը «կատարվել է նույնիսկ ավելցուկով»։