Զելենսկին Արևմուտքից ՀՕՊ է պահանջել «Օրեշնիկի» հարվածից հետո

Ուկրաինայի նախագահ Վլադիմիր Զելենսկին արձագանքել է Ռուսաստանի կողմից «Օրեշնիկ» բալիստիկ հրթիռի կիրառմանը՝ կոչ անելով արևմտյան երկրներին ուժեղացնել Ուկրաինայի հակաօդային պաշտպանության հնարավորությունները։ Համապատասխան գրառումը նա հրապարակել է իր Telegram-ալիքում։

Զելենսկիի խոսքով՝ հարվածը «ամենաբարձր ձայնով հիշեցում է գործընկերներին», որ Ուկրաինայի համար ՀՕՊ համակարգերի մատակարարումը մնում է մշտական առաջնահերթություն։ Նա ընդգծել է, որ չի կարելի կորցնել ոչ մի օր՝ ո՛չ մատակարարումների, ո՛չ արտադրության, ո՛չ էլ միջազգային պայմանավորվածությունների մակարդակում։

Ուկրաինայի նախագահի տվյալներով՝ հունվարի 9-ի գիշերը երկիրը ենթարկվել է մասշտաբային հարձակման․ «Օրեշնիկից» բացի կիրառվել է 242 անօդաչու թռչող սարք և 22 թևավոր հրթիռ, իսկ միայն էներգետիկ և քաղաքացիական ենթակառուցվածքների ուղղությամբ արձակվել է 13 բալիստիկ հրթիռ։ Ավելի վաղ ՌԴ պաշտպանության նախարարությունը հաստատել էր, որ «Օրեշնիկի» հարվածը եղել է պատասխան քայլ՝ 2025 թվականի դեկտեմբերի վերջին Կիևի կողմից Ռուսաստանի նախագահի՝ Վլադիմիր Պուտինի նստավայրի ուղղությամբ իրականացված հարձակման փորձին։