«Նա իմ միակ որդին է, ուզում եմ տեսնել նրա հարսանիքը». Ադրբեջանում գերության մեջ գտնվող Վիգեն Էուլջեքչյանը ձեռագիր նամակ է ուղարկել կնոջը

Ադրբեջանում գերության մեջ գտնվող լիբանանահայ Վիգեն Էուլջեքչյանի կինը՝ Լինդա Էուլջեքչյանը, Կարմիր խաչի միջազգային կոմիտեի աջակցությամբ ստացել է ամուսնուց ձեռագիր նամակ։

Euromedia 24-ի հետ զրույցում Լինդան նշեց, որ այս նամակը  երկար սպասված էր այն ժամանակվանից, երբ Կարմիր խաչը լքեց Ադրբեջանը, չնայած նրան, որ հեռախոսով կապ էին հաստատում:

Լինդան պատմեց, որ նամակում Վիգեն Էուլջեքչյանը որդուն խնդրել է հետաձգել իր հարսանիքը. նա ուզում է այդ պահին իր կողքին լինել՝ նրանց իր երախտագիտությունը հայտնելու համար:  «Սա իմ միակ որդին է. ես ուզում եմ տեսնել նրա հարսանիքը», – պատմեց Լինդան:

Լինդան հուզմունքով նշեց, որ դժվար է բառերով նկարագրել իր զգացմունքները. «Ես ստիպեցի աղջկաս այն 10 անգամ կարդալ, քանի որ ես հայերեն չգիտեմ։ Մենք բոլորս հուզվեցինք այս նամակից», – ընդգծեց նա:

Նրա խոսքով, Վիգեն Էուլջեքչյանի ցանկացած հաղորդագրություն մեծ նշանակություն ունի, քանի որ այն հաստատում է, որ նա ողջ է: Սակայն, թեև նամակը որոշակի հույս է ներշնչում,  լուրջ մտահոգություններ կան կապված նրա երկարատև կալանքի հետ:
Լինդան նշեց, որ Կարմիր խաչի աշխատակիցների տեղեկություններով, Վիգենի համար բժիշկ են բերել, որ մեջքի ցավի պատճառով նա չի կարողանում քայլել. դեղորայքը կօգնի նրան:

Լինդան հավելեց. «Մեծ պատիվ է տեսնել բազմաթիվ կազմակերպությունների աշխատանքը բանտարկյալների ազատ արձակման ուղղությամբ։ Ուրախ եմ, որ մարդիկ հիշում են մեր բանտարկյալներին իրենց աղոթքներում. սա մեզ հույս է տալիս»:

Հիշեցնենք, որ 46-ամյա Էուլջեքչյանը Հայաստանի և Լիբանանի քաղաքացի է: Ադրբեջանական զինված ուժերը Արցախում նրան առևանգել են 2020 թվականի նոյեմբերի 10-ին՝ Հայաստանի և Ադրբեջանի միջև հրադադարի համաձայնագրից մեկ օր անց, որը վերջ դրեց Արցախյան 44–օրյա պատերազմին:

Բաքվի ռազմական դատարանը 2021 թվականի հունիսին Էուլջեքչյանին 20 տարվա ազատազրկման դատապարտեց «վարձկանություն», «ահաբեկչություն» և «Ադրբեջանի պետական սահմանի ապօրինի հատում» հոդվածներով:

2023 թվականի դեկտեմբերին, հայ գերիների ազատ արձակման ժամանակ, Էուլջեքչյանի անունն ընդգրկված էր ադրբեջանական կողմի հրապարակած նախնական ցուցակում, սակայն նրան չվերադարձրին:

Մանե Գևորգյան