2500 տարվա ոսկե սաղավարտը հայտնաբերվել է․ աղմկահարույց գողությունից հետո գանձը վերադարձվել է

Նիդեռլանդներում անցած տարի թանգարանից գողացված 2500 տարվա հնության ոսկե սաղավարտը հայտնաբերվել է։ Ինչպես հայտնում է Associated Press-ը, խոսքը Կոտոֆենեշտիի սաղավարտի մասին է, որը համարվում է Ռումինիայի ամենակարևոր ազգային գանձերից մեկը՝ կապված Դակիայի քաղաքակրթության հետ։

Սաղավարտը գողացվել էր 2025 թվականի հունվարին՝ Դրենտս թանգարանում ցուցադրության ընթացքում, երբ հանցագործները ներխուժել էին շենք և տարել այն՝ երեք ոսկե ապարանջանների հետ միասին։ Քննության շրջանակում ձերբակալված անձանց հետ ձեռք բերված պայմանավորվածության արդյունքում հաջողվել է վերադարձնել նաև ապարանջաններից երկուսը։ Իրավապահները նշել են, որ գողացված իրերը դժվար էր վաճառել, և նույնիսկ մտավախություն կար, որ դրանք կարող էին հալեցվել։

Վերականգնված սաղավարտը որոշ վնասներ է կրել, սակայն, ինչպես նշել են թանգարանի ներկայացուցիչները, վնասը մշտական չէ։ Գողությունը լուրջ լարվածություն էր առաջացրել Նիդեռլանդների և Ռումինիայի միջև, քանի որ վերջինս այն բնորոշել էր որպես «պետության դեմ հանցագործություն»։ Հետաքննությունը շարունակվում է՝ նպատակ ունենալով գտնել նաև մնացած կորած ապարանջանը։