«Աջակցելու ենք ընդդիմադիր ուժերին, մեր ձայները չեն կորչելու». Սերժ Սարգսյան

 ՀՀ երրորդ նախագահ Սերժ Սարգսյանը հայտարարել է, որ իր ղեկավարած քաղաքական ուժը չի մասնակցելու առաջիկա ընտրություններին՝ նպատակ ունենալով չխորացնել ընդդիմադիր դաշտի պառակտումը։ Նրա խոսքով՝ Հանրապետական կուսակցության ընտրողների ձայները չեն կորի, այլ կմիանան ընդդիմադիր այլ ուժերի ընտրազանգվածին։

Սարգսյանը շեշտել է, որ իրենց համար առաջնահերթությունը իշխանափոխությունն է, այլ ոչ թե խորհրդարանում մի քանի մանդատ ունենալը։ «Մեզ իշխանափոխություն է պետք, մեզ չի հետաքրքրում մի քանի մանդատ ունենալու հեռանկարը։ Անցած տարիները ևս ապացուցել են այս որոշման ճշմարտացիությունը»,- նշել է նա։

Սարգսյանը նաև վստահեցրել է, որ նույնիսկ ընտրություններին ուղղակիորեն չմասնակցելու դեպքում Հանրապետական կուսակցությունը շարունակելու է ակտիվ դեր ունենալ քաղաքական գործընթացներում և մնալ ընդդիմադիր պայքարի առաջամարտիկներից մեկը։ Նախկին նախագահի գնահատմամբ՝ 44-օրյա պատերազմից հետո երկրում ձևավորվել է ներքաղաքական ծանր իրավիճակ։ Նա նշել է, որ, իր կարծիքով, գործող իշխանությունների վարած քաղաքականության հետևանքով աճել են հուսահատությունն ու անվստահությունը, խորացել է հասարակության բևեռացումը, իսկ բանակցային գործընթացում տեղի են ունեցել միակողմանի զիջումներ։ «Չենք մասնակցում ընտրություններին, որպեսզի էլ ավելի չպառակտենք ընդդիմադիր դաշտը»,- ընդգծել է Սարգսյանը։