Գերմանիան արգելք է սահմանել զորակոչային տարիքի քաղաքացիների համար

Գերմանական Berliner Zeitung թերթի փոխանցմամբ՝ Գերմանիան արգելել է 17-45 տարեկան տղամարդկանց երկար ժամանակով լքել երկիրը։

Թերթի տվյալներով՝ այս տարվա հունվարի 1-ից սկսած՝ 17-45 տարեկան բոլոր տղամարդիկ պարտավոր են թույլտվություն ստանալ Բունդեսվերի (Գերմանիայի զինված ուժերի) կարիերայի կենտրոնից, եթե մտադիր են լքել Գերմանիան երեք ամսից ավելի ժամկետով։ Նոր կանոնը վերաբերում է բոլոր ճանապարհորդություններին, անկախ նրանից՝ արտասահմանում ուսման, աշխատանքի, թե ճանապարհորդության համար։ Այս պահանջն այժմ գործում է մշտապես, այլ ոչ թե միայն «լարվածության կամ պաշտպանության իրավիճակներում»։

Թերթի կողմից մեջբերված Գերմանիայի պաշտպանության նախարարության խոսնակը նշել է, որ «այս կանոնակարգի հիմքը և ուղեցույցը արտակարգ իրավիճակներում զինվորական ծառայության ենթակա անձանց գրանցման հուսալի և տեղեկատվական համակարգի ստեղծումն է»։ Նա նշել է, որ երկրի իշխանությունները պետք է «իմանան արտակարգ իրավիճակի դեպքում, թե ով կարող է երկար ժամանակով մնալ արտասահմանում»։