ԱՄՆ-ը սահմանեց տիեզերական նոր ռեկորդ․ Orion-ը հասել է Լուսնի եզրին և վերադառնում է Երկիր

ԱՄՆ-ի NASA-ի Artemis II առաքելությունը գրանցել է պատմական արդյունք՝ գերազանցելով Apollo 13-ի սահմանած ռեկորդը։ Orion տիեզերանավը, որի անձնակազմում են Ռիդ Ուայզմանը, Վիկտոր Գլովերը, Քրիստինա Կոխը և կանադացի Ջերեմի Հանսենը, մոտեցել է Լուսնին ընդամենը շուրջ 6545 կմ հեռավորության վրա։ Միաժամանակ այն Երկրից հեռացել է մինչև 406,771 կմ՝ դառնալով մարդկության պատմության ամենահեռու թռիչքը։

Առաքելության ընթացքում տիեզերանավի արագությունը Երկրի նկատմամբ հասել է մոտ 97,950 կմ/ժ-ի, իսկ Լուսնին՝ շուրջ 5052 կմ/ժ։ Տիեզերագնացները շուրջ 7 ժամ դիտարկել են Լուսինը՝ կատարելով նաև մակերևույթի ուսումնասիրություններ և նույնիսկ նկարագրելով երկու մինչ այդ անվան չարժանացած խառնարաններ։ Նրանցից մեկը առաջարկվել է անվանել առաքելության հրամանատարի կնոջ պատվին։

Orion-ը արդեն սկսել է վերադարձի ճանապարհը դեպի Երկիր, իսկ դրա ջրային վայրէջքը նախատեսված է ապրիլի 12-ին Խաղաղ օվկիանոսում։ Առաքելության հիմնական նպատակը Orion-ի համակարգերի փորձարկումն է, սակայն այն նաև դիտարկվում է որպես ԱՄՆ-ի՝ Լուսնի վրա կրկին հաստատուն ներկայություն ունենալու ռազմավարության կարևոր փուլ՝ մրցակցելով Չինաստանի հետ, որը նույնպես նպատակ ունի մարդ ուղարկել Լուսին մինչև 2030 թվականը։