Պենտագոնը փորձում է խուսափել ռազմական հանցագործությունների մեղադրանքներից․ քննարկվում են նոր թիրախներ Իրանի համար

ԱՄՆ պաշտպանության նախարարությունում դիտարկում են հարվածների թիրախների ցանկի ընդլայնման տարբերակը՝ ներառելով նաև երկակի նշանակության օբյեկտներ՝ այնպիսի ենթակառուցվածքներ, որոնք ապահովում են ինչպես քաղաքացիական բնակչությանը, այնպես էլ զինվորականներին։ Այս մասին հայտնում է Politico-ն՝ հղում անելով աղբյուրներին՝ նշելով, որ այս մոտեցումը դիտարկվում է որպես միջոց՝ ռազմական հանցագործությունների մեղադրանքներից խուսափելու համար։

Աղբյուրների խոսքով՝ ամերիկացի ռազմական պլանավորողները վերանայում են հնարավոր հարվածների ցուցակը, մինչ ԱՄՆ-ի և Իսրայելի օդուժը որոնում է նոր թիրախներ։ Պենտագոնի ներկայացուցիչները պնդում են, որ նման օբյեկտների «երկակի նշանակությունը» կարող է դրանք դարձնել օրինական թիրախներ, քանի որ դրանք նաև ռազմական կարիքներ են սպասարկում։

Սակայն նույն կառույցում չկա միանշանակ դիրքորոշում․ որոշ պաշտոնյաներ կասկածի տակ են դնում այս մոտեցման հիմնավորվածությունը։ Քննարկումները կենտրոնանում են այն հարցի շուրջ, թե որտեղ է անցնում սահմանը քաղաքացիական և ռազմական օբյեկտների միջև՝ օրինակ, ջրամատակարարման կամ ջրի մաքրման համակարգերի դեպքում։ Միևնույն ժամանակ ՄԱԿ-ում արդեն զգուշացրել են, որ նման ենթակառուցվածքների թիրախավորումը կարող է դիտվել որպես միջազգային իրավունքի խախտում։